Хөвсгөл аймгийн Нэгдсэн эмнэлэгт өнөөдөр 27 настай эх хоёр дахь төрөлтөөрөө  гурван ихэр хүү төрүүлжээ. Амаржсан эх 35-36 хоногтойдоо төрсөн аж. Эх, хүүхдийн биеийн байдал ямар байгаа талаар Хөвсгөл аймгийн Нэгдсэн эмнэлгийн Эх барих эмэгтэйчүүдийн ерөнхий эмч П.Отгонбаяраас тодрууллаа. Тэрбээр “Өнөө өглөө манай эмнэлэгт Мөрөн сумын X хорооны иргэн М.Н гурван ихэр хүү төрүүлсэн. Эхний хүү 07:40 цагт 2.8 килограмм, хоёрдахь хүү 07:41 цагт 2.4 килограмм, гуравдахь хүү 07:42 цагт 2.6 килограмм жинтэй мэндэлсэн. Э.Инжэр, Б.Лхамноров, Т.Түмэнжаргал, сувилагч Д.Долгоржав, Б.Долгорсүрэн бид нар эхийг кесаров хагалгаагаар төрүүлсэн.  Одоо эх, хүүхдийн биеийн байдал хэвийн, сайн байна. Хүүхдүүд бүгд хөхөөрөө амалсан. Би сумандаа 28 дахь жилдээ ажиллаж байна. Энэ хугацаанд 9500 гаруй хүүхдийг эх барьсан. Сүүлд төрсөн гурван ихэр хүү миний эх барьж авсан дөрөв дэхь гурван ихэр юм. Мөн он гарсанаас хойш эхний гурван сарын байдлаар манай аймагт 607 эх амаржаад байна” гэлээ.