Монгол Улсын Ерөнхий сайд Л.Оюун-Эрдэнэ өнөөдөр Гадаад харилцааны яаманд ажиллалаа. Энэ үеэр Ерөнхий сайд Л.Оюун-Эрдэнэ хилийн чанад дахь Дипломат төлөөлөгчийн газрын тэргүүнүүдтэй цахимаар хуралдаж, Засгийн газраас баримталж буй бодлого, авч хэрэгжүүлэх арга хэмжээний талаар ярьж, гадаад харилцааны салбарт хэрэгжүүлэх шаардлагатай ажил байгаа талаар саналаа илэрхийллээ.

Тухайлбал, дархлаажуулалтыг эрчимжүүлэх чиглэлээр цар тахлын эсрэг вакцин авчрах ажлыг шуурхайлах, эдийн засгаа сэргээх чиглэлээр гадаадын хөрөнгө оруулалтыг нэмэгдүүлэх, гадаад түншүүдийн итгэлийг сэргээх, гадаад бодлогын хэрэгжилтийг нэгдмэл байдлаар хангах, хилийн чанадад байгаа монгол иргэдээ татан авах, тэдний эрх ашгийг хамгаалахад Гадаад харилцааны яам болон Дипломат төлөөлөгчийн газруудыг идэвх, санаачилгатай ажиллахыг уриалсан юм.

Цахим уулзалтын үеэр Дипломат төлөөлөгчийн газрын тэргүүнүүд хийж хэрэгжүүлж буй ажлын талаарх мэдээллээ Ерөнхий сайдад танилцуулж, санал бодлоо илэрхийллээ.