Сүхбаатар аймагт өнөөдрөөс ирэх сарын 5-ныг хүртэл хатуу хөл хорио тогтоолоо. Тус хугацаанд аймгийн ойролцоо 11 пост ажиллаж, томоохон уулзвар дээр мэргэжлийн байгууллагын алба хаагчид хяналт тавин ажиллаж байгаа талаар тус аймгийн шуурхай штабаас мэдээлсэн юм.

Аймгийн Засаг даргын 2021 оны энэ сарын 29-ний өдрийн захирамжаар бүх нийтийн бэлэн байдлын зэрэгт шилжсэнтэй холбоотойгоор 23 аж ахуй нэгж, байгууллагын үйл ажиллагаа хэвийн болон тусгай горимоор ажиллахаар болсон байна. Харин бусад төрийн байгууллагын нийт ажилчдын 10-аас дээшгүй хувийг ажиллуулахаар шийдвэрлэжээ. Одоогоор батлагдсан тохиолдлын ойрын хавьтлын 112, дам хавьтлын 600 орчим иргэнийг тусгаарлан ажиглаж байна. Эдгээрээс 37 иргэн тусгаарлан ажиглах байранд байна. Өнөөдрийн байдлаар хүнсний дэлгүүр, эмийн сан, цахим банк зэрэг үйлчилгээний газрууд хэвийн ажиллаж байгаа болохыг тус аймгийн шуурхай штаб мэдээллээ.