- Б.Даваасамбуу: Хоёр онгоц ижил өндөрт хурдаа авсан гэдгийг мэдээд их сандарсан-

Монгол ОХУ-ын агаарын хилийн зурвас дээр онгоц мөргөлдөхөөс сэргийлэх арга хэмжээг шуурхай авч, 400 гаруй зорчигчтой хоёр агаарын хөлгийн аюулгүй байдлыг хангаж ажилласан ИНЕГ-ын харьяа Иргэний нисэхийн үндэсний төвийн Нислэгийн хөдөлгөөний үйлчилгээний албаны нислэгийн удирдагч Б.Даваасамбууг ОХУ-ын нислэгийн хөдөлгөөний байгууллагын дээд шагналаар шагнахаар болсон билээ. Мөн ИНЕГ-ын даргын зөвлөлийн шийдвэрээр түүнийг салбарын дээд шагнал “Хүндэт ажилтан тэмдэг”-ээр шагналаа. Тухайн үед болсон үйл явдлын талаар Б.Даваасамбуутай цөөн хором ярилцлаа.

- Мэргэжлийн ур чадвар гарган шуурхай ажилласан танд баяр хүргэе.  Агаарын хөлөг мөргөлдөх эрсдэл үүссэн тэр өдөр болсон үйл явдлын талаар ярилцлагаа эхлэе?

- Өнгөрсөн нэгдүгээр сарын 23-ны өдөр болсон үйл явдал. Манайх ээлжээр ажилладаг. Өглөөний ээлж гарч байх үед энэ үйл явдал болсон юм. Тухайн хоёр агаарын хөлөг хилийн цэг дээр зөрж өнгөрөхөөр байсан. Оросын талаас “Korean Аir” агаарын хөлөг 10/100 манайх руу орж ирнэ гээд зөвшилцөл хийсэн байсан. Тэгээд хил рүү орж ирэхээс дөрөв минут орчмын өмнө өндрөө авч, манайхаас хөөрсөн онгоцтой ижил өндөрт өндрөө хадгалсан. Түүнийг нь хараад би өөрийнхөө агаарын хөлгийг замаас нь гаргаад хажуугийн зайчлалыг (мэргэжлийн хэллэг) хангуулж өгөх ёстой юм байна гээд, хөлгөө хажуугийн зам руу гаргах заавар нисгэгчид  өгсөн. Ингээд Оросын талд мэдээлэл өгсөн.

- Яг огтлолцох гэж байсан юм байна шүү дээ?

- Тийм. Яг өөд өөдөөсөө ирж байсан юм.

-Мөргөлдөх гэж байсан хоёр агаарын хөлгийг хэр хурдан хугацаанд өөр чиглэлд оруулах боломжтой байв?

-Миний санаж байгаагаар тухайн үед дөрвөн минутын л зайтай байсан.  Хэрвээ хоёр минут л хоцорсон бол аюултай зүйл болох байсан. Уг нь агаарын хөлгүүд хоорондоо мөргөлдөхөөс сэргийлсэн системтэй байдаг. Хэрвээ би хараагүй байсан бол тэр систем нь ажиллах байсан ч чиглэлээ өөрчлөхөд оройтох зэрэг хүндрэлтэй асуудал гарч болзошгүй байдал үүссэн байсан 

-Ийм асуудал үүсэх гэж буйг Оросын тал харж чадсан болов уу. Үүний дараа Оросын талд хэлэхэд хэрхэн хүлээж авсан бэ?

-Оросын талд ямар үйл явдал болж өнгөрсөнийг би сайн мэдэхгүй байна. Юу ч болсон байж болно шүү дээ.

Зарим тохиолдолд холбооны сүлжээ унах тохиолдол байна. Тэгэхээр Оросын талаас нисгэгчдээ холбоогоор заавар өгөхөд сонсож чадаагүй байхыг бас үгүйсгэх аргагүй.

- Тухайн хоёр агаарын хөлгийг амжилттай зөрүүлчихээд юу бодогдсон бэ?

-Үнэндээ их сандарсан. Тийм ойрхон зайнд, ижил өндөртэй явж байна гэдэг чинь аюултай нөхцөл байдал үүссэн гэсэн үг. Одоо санахад их л сандарч байсан. Гэхдээ бид нарыг байнга сургалтанд хамруулдаг. Ийм асуудал үүслээ гэхэд ямар арга хэмжээ авах вэ гэдэг талаар сургадаг болохоор би онгоцныхоо чиглэлийн бага зэрэг өөрчлөөд  шуурхай арга хэмжээ авсан даа. Нислэг үйлдэх нь багийн ажил. Бидэнд заавар зөвлөгөө өгч байдаг удирдлагууддаа талархаж байна.

- Нислэгийн удирдагч гэхээр ямар чиг үүрэгтэй мэргэжил юм бэ?

- Нислэгийн удирдагчийн гол үүрэг нь агаарын хөлгүүдийг мөргөлдөхөөс урьдчилан сэргийлэх, зохицуулалт хийх юм. Агаарын хөлөг хөөрөхөөс буух хүртэл нисгэгчид бид нартай холбоотой байдаг. Энэ олон агаарын зам хаа нэгтээ заавал огтлолцож байдаг. Тэгэхээр ижил өндөрт агаарын хөлгүүд давхцаж байвал бид нар зохицуулалт хийх л ёстой. Энэ удаад би ажлаа хийж гүйцэтгэсэн гэж бодож байгаа.

Ярилцсанд баярлалаа