Дархан-Уул аймаг Хятад улсын "Синофарм" вакцины 1000 тунг хүлээн авчээ. Тус аймагт өнөөдрөөс халдварын эсрэг ажиллаж буй эмч, эмнэлгийн ажилчдыг вакцинд хамруулж байна.

Энэ талаар Дархан-Уул аймгийн засаг дарга Б.Азжаргал “Манай аймагт өнөөдрийн байдлаар коронавирус халдварын нийт 30 тохиолдол батлагдсан. Өнгөрсөн 24 цагийн хугацаанд 598 иргэнээс PCR шинжилгээ авахад бүгд сөрөг гарсан. Өнөөдөр манай аймагт коронавирусийн эсрэг дархлаажуулалт эхэллээ. Эхний ээлжинд хоёр мянган хүн тун вакциныг хийх боломжтой. Вакцинжуулалтыг хоёр чиглэлээр хийнэ. Нэгдүгээрт, төрийн байгууллагын журмаар ирсэн вакциныг эрсдэлт бүлгийн иргэдэд дарааллын дагуу хийнэ.

Үүнд, эмч, эмнэлгийн ажилтнууд, онцгой байдал, цагдаа, мэргэжлийн хяналт, аймгийн  шуурхай комиссын гишүүд зэрэг халдварын эсрэг ажиллаж буй алба хаагчид багтана. Хоёрдугаарт, ахмад настан, хөгжлийн бэрхшээлтэй иргэдийг дархлаажуулалтад хамруулна” гэв. Мөн өнөөдөр орой үлдсэн 1000 хүн тун вакциныг хүлээн авна гэдгийг мэдээллийн үеэр хэллээ.