Монгол Улсын нутаг дэвсгэрээс олдсон байж болзошгүй түүх, соёл, археологийн нэн эртний Хүннүгийн үед хамаарах “Шилэн гүц”, “Хаш тээг” зэрэг нэн эртний олдворыг хууль бусаар борлуулах гэж байсан бүлэг этгээдийг энэ сарын сарын 25-ны өдөр Цагдаагийн ерөнхий газрын Эрүүгийн цагдаагийн албаны алба хаагчид илрүүлжээ. 

Уг хэргийг Монгол Улсын иргэн А, Х, Д, А нар үйлдсэн байж болзошгүй тул холбогдуулан шалгаж байгаа аж. Монгол Улсын Эрүүгийн хуулийн тусгай ангийн 25.5 дугаар зүйл Соёлын биет өвийн хууль бус худалдааг зохион байгуулах, зуучлах хэрэг бүртгэлийн хэрэг нээн, шалгалтын ажиллагааг үргэлжлүүлж эхэлсэн гэх мэдээлэл гарсан.

Энэ талаар ЦЕГ-ын Хэвлэл мэдээллийн төвийн дарга, дэд хурандаа Б.Баатархүүгээс тодрууллаа. Тэрбээр “Тус хэрэг хаана, хэрхэн болсон талаар дэлгэрэнгүй мэдээлэл өгөх боломжгүй. Дээрх этгээдүүдийн хууль бусаар борлуулах гэж байсан олдвор шинжилгээгээр тогтоогдвол МЭӨ Грек, Ромд үйлдвэрлэж байсан олдвор юм шиг байна лээ. Дээрхтэй адил олдвор дэлхийд тав, зургаа байдаг гэсэн. Энэ хэрэгт дөрвөн иргэнийг холбогдуулан шалгаж байгаа” гэв. Мөн Археологийн хүрээлэнгийн захирал Г.Рэгзэнгээс тодруулахад “Одоогоор манайд үүнтэй холбоотой мэдээлэл ирээгүй байна” гэсэн юм. 

 Түүх, соёл, археологийн нэн эртний Хүннүгийн үед хамаарах эртний олдворыг хууль бусаар борлуулах гэж байсан этгээдүүд 25-40 насныхан аж. Тэд өмнө нь ийм төрлийн хэрэг үйлдэж, ял шийтгэл эдэлж байсан байж болзошгүй гэдгийг эх сурвалж хэлсэн юм.

Тус этгээдүүдийн хууль бусаар борлуулах гэж байсан түүхэн одворуудтай ижил бүтээлүүдийг төрийн өмчит Улаанбаатар их сургуулийн багш, оюутны сургалт, эрдэм шинжилгээний ажлын хүрээнд 2001-2011 онд Архангай аймгийн Өндөр-Улаан сумын Хануй багийн нутаг Хануй голын хөндий дэх хүрэл зэвсгийн эрин үеийн хиригсүүр, буган чулуун хөшөө бүхий газар, Балгасан тал буюу Гол мод II хэмээх газар хүннүгийн хаад, язгууртны булш бүхий бүлэг дурсгалтай газраас олсон судалгааны бүтээлүүдтэй төстэй байж болзошгүй юм.

2001-2011 онд Архангай аймгийн Өндөр-Улаан сумаас судалгааны хүрээнд олсон археологич нарын бүтээлтэй танилцана уу.

Хууль бусаар борлуулах гэж байсан эртний олдворууд тухайн үед судлаачдын олсон бүтээлтэй ижил эсэхийг Археологич, доктор Д.Эрдэнэбаатараас тодрууллаа. Тэрбээр “Ийм хэрэг гарсан гэх мэдээ байна. Гэхдээ надтай ямар ч хамаагүй. Би энэ талаар хэлж мэдэхгүй” хэмээн гар утсаа тасалсан юм. Тус хэргийг Эрүүгийн цагдаагийн газраас үргэлжлүүлэн шалгаж байна.