“Лувсанданжанравжаа” академийн санаачилгаар “Цэцгэн эрхт Ловон бурхны” цогцолбор хөшөө буюу цэцэрлэгт хүрээлэн байгуулах томоохон бүтээн байгуулалтын ажлыг эхлүүлэх гэж байна. Улаанбаатар хотын төвөөс  долоон километр зайд буюу Хан-Уул дүүрэг Богд Хан уулын Чандманийн аманд бий болох цэцэрлэгт хүрээлэн нь тав орчим га талбайг хамрах бөгөөд 90  хувь нь ногоон байгууламж байхаар зураг төслөө боловсруулжээ.

Дэд бүтцийн ажилтай холбоотойгоор Чандманийн  аманд, худаг гаргах, зам тавих зэрэг ажлыг эхлүүлсэн байна. Гэвч үүнтэй холбоотой цахим орчинд “Дархан цаазат Богд Хан уулыг ухаж байна” гэх мэдээлэл  түгсэн. Газрын зөвшөөрөл болон бүтээн байгуулалтын ажил хуулийн дагуу явж байгаа бөгөөд цэцэрлэгт хүрээлэн баригдаж дууссаны дараа нөхөн сэргээлтийн ажлыг хийх аж.

Эртний түүх соёлоо сурталчлан таниулах, өвлүүлэн үлдээхэд дээрх бүтээн байгуулалтын ажил томоохон хувь нэмэр оруулна гэдгийг энэ үеэр онцолж байлаа. Энэ оны гуравдугаар сараас эхэлсэн бүтээн байгуулалтын ажил 2023 онд дуусах аж.