Дэлхийн эрүүл мэндийн байгууллагаас жил бүрийн гуравдугаар сарын 24-ны өдрийг “Сүрьеэтэй тэмцэх өдөр” болгон зарласан бөгөөд энэ өдөр улс орнууд сүрьеэ өвчний тохиолдлын тоо баримт, мэдээлэл, сургалт, суртачилгааг нийтэд мэдээллэдэг. Сүрьеэ нь дэлхийд нас баралтаар тэргүүлэх 10 өвчний нэг бөгөөд жил бүр 10 сая тохиолдол бүртгэгдэж, 1,6 сая хүн уг өвчний улмаас нас барж байгаа аж.

Монгол Улс гуравдугаар дугаар сарын 24-ний өдрийг НҮБ-ын гишүүн орны хувьд сүрьеэгийн эсрэг олон нийтэд чиглэсэн үйл ажиллагааг өргөн хүрээнд зохион байгуулж, сүрьеэгийн эсрэг дуу хоолойгоо хүргэсээр ирсэн билээ. Манай улс ДЭМБ-ын Номхон далайн баруун эргийн бүсийн 37 орноос сүрьеэгийн өвчлөл өндөртэй долоо улсын нэг болж дөрөвдүгээрт орсон байна.

Сүрьеэ өвчинтэй тэмцэх өдрийг тохиолдуулан дэлхийн 200 гаруй улсын эрүүл мэндийн сайд нар оролцсон хуралд манай улсын Эрүүл мэндийн сайд С.Энхболд үг хэллээ. Тэрбээр “Дэлхий дахинд нас баралтын тэргүүлэх 10 шалтгааны нэг нь Сүрьеэ өвчин болжээ. Энэ өвчин нь эмчлэгдэж, эдгэрдэг хэдий ч 2000 оноос хойш 30 сая гаруй хүн нас бараад байна. Үүнээс дийлэнхи тохиолдол нь Ази болон Африк тивд бүртгэгдэж байна. Сүрьеэ өвчинтэй тэмцэх үйл хэрэгт олон нийтийг хамруулах, хүн бүрийн хүчин чармайлт чухал гэдгийг суртачилан таниулах нь чухал хэмээн үзэж ДЭМБ 1998 оноос эхлэн энэ өдрийг “Сүрьеэтэй тэмцэх өдөр” болгон тэмдэглэн өнгөрүүлдэг болсон. 2021 оны энэ өдөр “Цаг явсаар байна” хэмээн дэлхий нийтээр Сүрьеэ өвчинийг устгах амлалтаа биелүүлэхийг анхааруулж, биднээс эрч хүч, шинэ санаа, санаачилгатай ажлахыг шаардаж байна. Манай улсад бүртгэгдэж буй халдварт өвчний 10 хувийг Сүрьеэ өвчин эзэлдэг. Жилд 4000 орчим Сүрьеэгийн шинэ тохиолдол бүртгэгдэж, нас баралтаараа халдвар өвчиний дотор нэгдүгээрт орж байна. 2020 оны жилийн эцсийн байдлаар улсын хэмжээнд Сүрьеэгийн 3329 шинэ тохиолдол бүртгэгдсэн. Өнгөрсөн оны мөн үетэй харьцуулахад 295 тохиолдолоор буурсан. Дэлхий дахинд цаг явсаар байна. Бид анхааралдаа авч ажиллах болно” гэлээ.