“Сэмжид хужирт” рашаан сувилалд амарсан хэд хэдэн хүнээс коронавирусийн халдвар илэрсэн. Үүсээд байгаа нөхцөл байдалтай холбогдуулан тус сувиллын захирал А.Бямбасүрэн мэдэгдэл гаргалаа.

Тэрбээр “Сэмжид хужирт" рашаан сувилал нь 2015 оноос тогтвортой үйл ажиллагаа явуулж байгаа, харьцангуй залуу хамт олон юм. Тус сувиллын ард том толгойтой дарга битгий хэл, хөрөнгө оруулагч компани ч байхгүй бөгөөд банкны зээл, ажилчдынхаа хүч хөдөлмөр, сувилуулагчдынхаа итгэл, найдварын хүчээр дөнгөж өндийж буй байгууллага билээ.

Товчхондоо, бид модоо хагалж, усаа зөөж, тоосгоо эвлүүлсээр өнөөдрийн түвшиндээ ирсэн. Эрүүл мэндийн байгууллагад Боловсролын яамнаас бусад бараг бүх яамнаас шалгалт орж ирдэг. Өгүүлбэрийнхээ заалт бүрийн эхнээс огтолно, тайрна гэсэн хууль журмын “ГАЛ” дунд төрийн дарамтыг хангалттай амсаж яваа.

Ажилчидтайгаа хамтран жил бүр цалингаа 10 хувь өсгөх зорилт тавьж, 2020 оны эхэнд цалингаа 30 хувь хүртэл нэмж, цар тахлын хүнд хэцүү үеийг сөрж ажилласан. Аймгийн ИТХ-ын шийдвэрийг дагаж 2019 оноос 80 сая гаруй төгрөгийн өртөг бүхий машин зээлээр авч, бохир усаа 55 км зөөвөрлөж байна. Үүнд жилдээ 40 сая орчим төгрөг зарцуулдаг. Нөр их ажлынхаа хажуугаар ажилчид маань сувилуулагчдадаа орой бүр  концерт тоглож, олсон орлогоороо хоёр айлыг орох оронтой болгож байлаа.

 Хөлбөмбөгийн “Титэм хужирт” клубийг анхнаас нь байгуулалцаж, ивээн тэтгэж улсын аварга шалгаруулах тэмцээнээс зургаан медаль авахад нь хувь нэмрээ оруулжээ.Энэ өвөл гэхэд орон нутгийн 500 гаруй иргэнийг 50 хувь хямдралтай, тусламж хэрэгтэй 20 гаруй иргэнийг тус тус үнэгүй сувилж, постод гарч буй онцгой байдлын албан хаагчдыг гэр, хоол хүнсээр хангах ажлыг тасралтгүй явуулж ирсэн.

Санаачилсан олон нийтийн ажил, хандив, тусламжуудаа нийгэмд сурталчилж магтуулах, төрд мэдүүлж, шагнал горьдож яваагүй. Цар тахлын үеийн нөхцөл байдлыг дүгнэж 2020 оны арваннэгдүгээр сарын 12-ноос 60 хоногийн хугацаатай, 2021 оны хоёрдугаар сарын 1-нээс 20 хоног үйл ажиллагаагаа зогсоож байсан. Үндсэндээ бид энэ өвөл гурван сар шахуу ажиллаагүй билээ.

Аймгийн Онцгой комиссын шийдвэрийн дагуу орон нутгийн иргэддээ тодорхой хязгаартай үйлчилж байгаад Өвөрхангай аймгийн Засаг даргын А/100 тоот захирамжийн дагуу Улаанбаатар хотоос ирэх сувилуулагчдаа PСR шинжилгээтэй, ногоон бүсээс ирэх сувилуулагчдаа хэвийн горимоор хүлээж авсан.

Улаанбаатар хотоос 2021 оны гуравдугаар сарын 5-наас 50 гаруй хүн хүлээн авч, үйлчилсэн. Улаанбаатар хотын иргэд PCR шинжилгээтэй байж гурван удаагийн хяналт шалгалтыг нэвтэрч ирдэг. Бид давхар шалгадаг.

Аймгийн онцгой комисс Улаанбаатар хотоос сувилуулагчид авахыг хориглосон хугацаа буюу гуравдугаар сарын 13-ны оройноос хойш нийслэлээс хүн хүлээж аваагүй. Гуравдугаар сарын 15-нд Улаанбаатар хотоос сувилуулагчид хүлээж авсан гээд байгаа нь “Хужирт рашаан” сувилал хаасны улмаас шилжиж  ирсэн хоёр хүн юм. Тэдгээр хүн гуравдугаар сарын 10-нд ирээд сувилуулж байсан. Шуурганаар шилжиж ирсэн 13 хүнээс хоёр хүний хариу эерэг гарсан.        

 Миний бие өөрөө 2021 оны гуравдугаар сарын 10-нд гэр бүлийн хамт PCR-ийн шинжилгээгээ өгөөд Хужирт суманд очсон. Надтай хамт очсон хүмүүсийн ихэнх нь хоёр удаагийн давтан PCR шинжилгээтэй байсан. Гадаа байшинд зарим нь, үлдсэн нь нэг талдаа байрлаж бусад үйлчлүүлэгчтэй холилдохгүйгээр тусдаа хооллож байсан. Зарим хүмүүс нь эмчилгээ хийлгэсэн.

Хоёр удаа спорт зааланд тоглосны нэг нь амралтын өдөр таарсан. Гэхдээ сургуулийн хаалгаар бус, заалны гадна хаалгаар орж орон нутгийн хүнтэй хавьтал үүсгээгүй. Тухайн үед спорт заал төлбөртэй үйлчилж байсан болно. Ямар ч уралдаан тэмцээн болоогүй. Үүнийг гэрчлэх 15 хүн бий. Улмаар 2021 оны гуравдугаар сарын 13-ны УОК-ын шийдвэр, АОК-ын чиглэлийн дагуу гуравдугаар сарын 15-ны өглөө хүмүүсээ аваад нийслэл рүү буцсан болно. Нийслэлд ирээд өгсөн манай хүмүүсийн PCR шинжилгээний хариу сөрөг гарсан ба өчигдөр шинжилгээ өгсөн зарим хүний хариу хүлээгдэж байна. Эрсдэлтэй байхыг үгүйсгэх арга алга. Манай гэр бүлийн шинжилгээний хариу сөрөг гарсан.

Өвчин хэлж ирэхгүй хийсэж ирнэ. “Сэмжид хужирт” рашаан сувиллаас эхэлж илэрсэн болохоос халдвар хаанаас анх тарсныг одоогоор хэн ч тогтоогоогүй. Санаатай, санаагүй ам дамжсан мэдээлэл газар авч, түүнийг нь хэвлэл мэдээллийн хэрэгсэл, цахимаар улс орон даяар цацаж, нийгэмд үзэн ядагдах хандлагатай байна. Ажилчид руу, тэдгээрийн гэр бүл, үр хүүхэд рүү чиглэсэн ялгаварлан гадуурхалт, ил далд мэдрэгдсээр байна.

Зарим албаны хүмүүс биднээс тайлбар авахгүйгээр сонссоноороо мэдэгдэл хийж буй нь нийгэмд ташаа мэдээлэл тарахад хүргэлээ. Төрийн байгууллага нь 400 хүнд хуурамч шинжилгээ бичиж өгөөд орон нутаг руу тараачихсан энэ тохиолдолд бид хэнд итгэж найдах юм бэ.

Төр удирдаж буй дарга нар нь үйл олноороо маскгүй тэврэлдэж буйгаа телевизээр сурталчилж байхад бид иргэдэд халдвар хамгааллын дэглэм сахиулахад амаргүй байлаа. Бидэнд дотоод алдаа гарсан байхыг үгүйсгэхгүй ээ. Буруугаа бусад руу чихэх бодол ч алга.

Энэ завхралын эцсийн тусгал болж, хамт олноороо яллуулж буйдаа үнэхээр харамсаж байна. Рашаан сувилалд тангаргаа өргөсөн эмч, эмнэлгийн мэргэжилтнүүд ажиллаж, иргэдэд эрүүл мэндийн үйлчилгээ үзүүлдэг. Орон нутаг, улс орон даяар нөхцөл байдал хүндэрвэл “Сэмжид хужирт” рашаан сувилал нь “ор дэлгэх”-ээр орон нутгийн нөөцөд авсан байсан.

Үүссэн нөхцөл байдалтай холбогдуулж шуурхай арга хэмжээ авч ажиллаж буй орон нутгийн удирдлага, мэргэжлийн байгууллагадаа талархъя. Бидний нөхцөл байдлыг ойлгож, цар тахлын хүнд үеийг даван туулахад сэтгэлийн дэм өгч буй иргэд, сувилуулагчид, хамтран ажилладаг байгууллагууддаа баярлалаа.

Миний бие эрүүл мэндийн шалтгааны улмаас сүүлийн жил гаруй хугацаанд зайнаас ажлаа удирдсан “АЛДАА” бий. Албан байгууллага бүрд зовлон, жаргал бий. Шуурганаар салсан дээврээ янзалж, иргэн хүн шиг зээлээ төлж, цалингаа авч цаашид амьдрах ёстой. Хөлсөө дуслуулан зүтгэх хамт олныхоо улаан гарнаас өөр “ар”-гүй жирийн нэг сувиллыг ойлгохыг хичээгээрэй. Цалин, татвар, зээлийнхээ ард гарчихаад сар бүр баярлаж байдаг 40 гаруйхан хүнтэй хамт олон юм шүү.Энэ жил бид цалингаа нэмж, хамт олноороо орон сууцтай болох зорилт тавьж, урам зориг дүүрэн байлаа. Манайх даргын нуруун дээр бус, ажилчдынхаа нуруун дээр явдаг газар. Үүссэн нөхцөл байдалтай холбогдуулж бүх хүнээс уучлалт гуйя” гэжээ.