Чингэлтэй дүүргийн 246 дугаар цэцэрлэгийн багш, ажилтнууд коронавирусийн халдвар авчээ. Тус цэцэрлэгийн багш, ажилтнууд гуравдугаар сарын 1-нээс эхлэн цугларч ажиллаж байгаа аж.

Энэ талаар 246 дугаар цэцэрлэгийн эрхлэгч Я.Саранчимэгээс тодруулахад “Манай цэцэрлэгийн гурван ажилтнаас халдвар илэрсэн нь үнэн. 13 хоногийн өмнө нэг хүнээс халдвар илэрч, ажилтнуудаас шинжилгээ авахад багш, ажилтны шинжилгээний хариу эерэг гарсан. Бусад ажилтнуудын анхан болон давтан шинжилгээнээс халдвар илрээгүй. Ганц манай цэцэрлэг ч гэлтгүй дүүрэг, нийслэлийн хэмжээний цэцэрлэгүүдийн ажилтнуудын 30 хувь нь ажиллаж байгаа. Энэ захирамжийн дагуу л манай цэцэрлэг ажиллаж байсан юм. Харин одоо халдвар илэрсэн учраас 14 хоногийн хугацаанд гэр хорионд байгаа. Коронавирусийн халдвар авсан ажилтнуудын нэг нь бүрэн эдгэрч гэртээ гарсан байна лээ. Харин нэг нь маргааш эмнэлгээс гарна гэсэн. Биеийн байдал нь сайн байгаа. Манай цэцэрлэгт халдвар голомтлож тархаагүй. Мөн гурван ажилтны гэр бүлийн хүмүүс халдвар авсан эсэхийг мэдэхгүй” гэлээ.