Оюутолгой ХХК-ийн ажилтнаас коронавирусийн халдвар илэрсэн талаар бид мэдээлсэн. Үүнтэй холбоотой Өмнөговь аймгийн Засаг даргын Тамгын газраас цар тахлын эсрэг хэрэгжүүлэх хариу арга хэмжээний талаар өнөөдөр танилцууллаа. Халдвар авсан Оюутолгойн ажилтанг ХӨСҮТ-д хэвтүүлэн эмчилж байгаа бөгөөд  биеийн байдал нь хөнгөн байгаа талаар албаныхан мэдээлсэн. Өчигдөр батлагдсан тохиолдлын ойрын хавьтал 43  хүнийг тусгаарлан, PCR шинжилгээнд хамруулахад хариу нь сөрөг гарчээ. Мөн дам хавьтлуудыг тусгаарлан PCR  шинжилгээг Гашуунсухайт болон Оюутолгойн лабораторид хийхэд хариу нь сөрөг гарсан байна.

Харин өнөөдөр Оюутолгойд батлагдсан нэг тохиолдлын ойрын хавьтлаас сэжигтэй тохиолдол илэрсэн учраас ХӨСҮТ-рүү шилжүүлсэн аж. Сэжигтэй тохиолдлын PCR шинжилгээний хариу хараахан гараагүй байгаа гэнэ. Халдвар гарснаас хойш ээлж солилцсон учир тус компанийн ажилчид бусад аймаг руу явсан гэх мэдээлэл бий. Энэ талаар Өмнөговь аймгийн Засаг даргын орлогч Ч.Баяржаргал “Ээлж солигдож, иргэд орон нутаг руу явсан нь үнэн. 10 аймагт  иргэд очсон учраас аймгуудын Онцгой комисстой мэдээлэл солилцоод иргэдийг тандах ажлууд хийж байн” гэлээ.