Хүчтэй цасан болон шороон шуурганы улмаас үүссэн нөхцөл байдалтай холбогдуулан ОБЕГ-аас мэдээлэл хийлээ. Энэ үеэр  Олон нийттэй харилцах хэлтсийн дарга, хурандаа Б.Дуламсүрэн “Хүчтэй цасан болон шороон шуурганы улмаас Архангай, Булган, Баянхонгор, Говь-Алтай, Говьсүмбэр, Дундговь, Өвөрхангай, Өмнөговь, Завхан, Увс, Төв, Хөвсгөл, Ховд зэрэг аймгийн 46 суманд 548 хүн төөрсөн. Төөрч, сураггүй алга болсон иргэдийн дуудлагаар Онцгой байдлын алба хаагчид эрэн хайх аврах ажиллагаа хийлээ. Тэдгээрийн 467 иргэнийг эсэн мэнд олсон. Өнөөдрийн 10:00 цагийн байдлаар 81 хүнийг эрэн хайх аврах ажиллагаа зохион байгуулан ажиллаж байна. Мөн 58 гэр, 120 гаруй хашаа, саравч нурсан, 20 байшингийн дээвэр нурж, 1200 мал шуурганд уруудсан байна. Цаг агаарын аюулт үзэгдлийн улмаас ОХУ-аас баруун бүсийн аймгуудад цахилгаан эрчим хүч нийлүүлдэг СИ458 агаарын шугамын 216 дугаар тулгуур багана унасан. Тиймээс Баян-Өлгий, Ховд, Увс аймагт цахилгаан тасарсан байна. Цаг агаарын аюулт үзэгдлийн улмаас Дундговь аймагт таван хүн, Архангай аймгийн Өгийн нуур суманд таван настай нэг хүүхэд нас барсан” гэлээ.