Онцгой байдлын ерөнхий газраас ирэх долоо хоногийн цаг агаарын төлөв байдлыг танилцуулжээ. Ирэх долоо хоногоос хүйтний эрч сулрах төлөвтэй байгаа юм. Цаг агаарын төлөв байдлын дэлгэрүүлбэл,

Өнөөдөр:

Улаанбаатар хотод багавтар үүлтэй, цас орохгүй. Салхи баруун  өмнөөс 4-9 м/с, 10-12 градус дулаан байна. Нутгийн баруун хэсгээр үүлшиж бусад нутгаар багавтар үүлтэй, цас орохгүй. Салхи ихэнх нутгаар баруун өмнөөс  5-10 м/с. Увс нуурын хотгор болон  тэс голын хөндийгөөр 5-10 градус хүйтэн, Монгол-Алтай, Хангай, Хөвсгөлийн уулархаг нутаг, Дархадын хотгор, Завхан голын эх, Хүрэнбэлчир орчим, Идэр голын хөндийгөөр гурван градус дулаанаас хоёр градус хүйтэн, Их нуруудын хотгор, Хангайн нурууны өвөр бэл болон говийн бүс нутгийн өмнөд хэсгээр 14-19 градус, бусад нутгаар 7-12 градус дулаан байна. гэж ОБЕГ-аас мэдээллээ.

Ирэх долоо хоногийн төлөв байдлаар:

13-ны өдөр Монгол-Алтай уулархаг нутгаар, 14-ны өдөр баруун болон төвийн аймгуудын ихэнх нутгаар, говийн аймгуудын нутгийн хойд хэсгээр, зүүн аймгуудын нутгийн баруун хэсгээр, 15-ны өдөр нутгийн зүүн хагаст нойтон цас орж хүчтэй цасан шуурга шуурна. 16-ны өдөр баруун болон төвийн аймгуудын нутгийн хойд хэсгээр цас орж, зөөлөн цасан шуурга шуурна. Салхи 13-ны өдөр Алтайн уулархаг нутгаар, 14-ний өдөр ихэнх нутгаар, 15-ны өдөр нутгийн зүүн хагаст 16-18 м/с, зарим үед 24 м/с хүртэл ширүүсэж, хүчтэй шороон шуурга шуурна. 14-ний өдөр баруун болон төвийн аймгуудын нутгаар, 15-ны өдөр ихэнх нутгаар хүйтэрч Увс нуур болон Дархадын хотгор, Тэс голын хөндийгөөр шөнөдөө 25-30 градус, өдөртөө 13-18 градус, Хангай, Хөвсгөл, Хэнтийн уулархаг нутаг, Завхан голын эх, Идэр, Хараа, Ерөө, Хэрлэн, Туул, Тэрэлж, Халх голын хөндийгөөр шөнөдөө 19-24 градус, өдөртөө 7-12 градус, Хангайн нурууны өвөр бэл, говийн бүс нутгийн өмнөд хэсэг болон цас багатай, энгэр ээвэр газраар шөнөдөө 5-10 градус хүйтэн, өдөртөө 0-5 градус дулаан, бусад нутгаар шөнөдөө 12-17 градус, өдөртөө 2-7 градус хүйтэн байна. 16-ны өдөр ихэнх нутгаар хүйтний эрч суларна.

Д.ЦЭДЭВСҮРЭН