“Бишрэлт групп”-ын гурван ажилтнаас коронавирусийн халдвар илэрсэн. Гэвч байгууллагын үйл ажиллагаа хэвийн үргэлжилж байна гэх мэдээлэл цахим орчинд тархаад байгаа билээ. Энэ талаар “Бишрэлт групп”-ын үйл ажиллагааны менежер Э.Болд-Эрдэнээс тодрууллаа. 

Тэрбээр “Манай ажилтан Төв аймагт амарч байсан. Тухайн ажилтан руу ХӨСҮТ-ээс холбогдож “Та “Анна Каренина”жүжигт тоглосон жүжигчны найз юм байна. Та шинжилгээ өгөх хэрэгтэй” гэж ярьсан юм билээ. Шинжилгээний хариугаар  тухайн иргэнээс коронавирусийн халдвар илэрч ХӨСҮТ-д ирсэн. Тухайн ажилтан сүүлийн 14 хоног ажиллаагүй. Ажилтан маань хүний нөөцийн ажилтан руу холбогдож “Би коронавирусийн халдвартай. ХӨСҮТ-д эмчлүүлэхээр ирсэн” гэж ярьсан.

Тэгэхээр нь бид  ХӨСҮТ рүү холбогдож “Манай ажилтан коронавирусийн халдвартай эмнэлэгт хэвтсэн юм байна. Бид яах ёстой вэ” гэхэд ХӨСҮТ-ээс “Ямар нэгэн чиглэл байхгүй. Бид ачаалалаа дийлэхгүй байна” гэсэн. Бид ариутгалын компани дуудаж ажлын байраа ариутгасан. Мөн “Гялс” төвтэй холбогдож өчигдөр 17:00 цагийн үед ажиллаж байсан бүрэлдэхүүнээрээ шинжилгээ өгсөн. Бидний хариу бүгд халдваргүй гэж гарсан. Тийм учраас ажил хэвийн үргэлжилж байна. Харин манай компанийн амарч байгаа ажилчдаас халдвар илэрсэн үгүйг мэдэхгүй. Хэрвээ халдвар илэрсэн бол ХӨСҮТ-ээс манай байгууллага руу ярьж, ямар нэгэн арга хэмжээ авах байх. “Бишрэлт групп”-ын гурван ажилтнаас коронавирусийн халдвар илэрсэн гэх мэдээлэл үндэслэлгүй гэдгийг хариуцлагатайгаар мэдэгдэж байна” гэлээ.