Аж үйлдвэр, эрдэс баялгийн яамны удирдлагын ээлжит шуурхай хуралдаан болж, Төрийн нарийн бичгийн дарга Б.Дашпүрэв яам болон харьяа байгууллагуудын ажлын явцтай танилцан, салбарын үйл ажиллагааг эрчимжүүлэх чиглэлээр үүрэг, даалгавар өгчээ.

   Тэрбээр төрийн үйлчилгээг шуурхай, хүртээмжтэй болгох, иргэн, аж ахуйн нэгжээс ирүүлсэн өргөдөл, хүсэлтийг хугацаанд нь шийдвэрлэх, төрийн үйлчилгээний хүнд суртлыг бууруулахыг үүрэг болгосон байна. Мөн салбарын цахим системүүдийг нэгтгэж, мэдээллийн нэгдсэн сан бүрдүүлэх ажлыг эрчимжүүлэх чиглэл өгчээ.

      Шатахууны хангамж, нөөцийг нэмэгдүүлэх хүрээнд нийлүүлэлтийн тогтвортой байдлыг хангаж, дотоодын боломжит эх үүсвэрийг ашиглах хувилбаруудыг судлахаар болов. Тухайлбал, “Петро Матад” компанийн олборлосон 70-80 мянган тонн түүхий тосыг дотоодын бага оврын үйлдвэрүүдэд боловсруулж, шатахуун үйлдвэрлэх боломжийг судлах үүрэг өгчээ. Мөн ашигт малтмалын хайгуул, ашиглалтын тусгай зөвшөөрлийн тооллогыг дуусгаж, нэгдсэн мэдээллийн сан бүрдүүлэх, хайгуулын талбайн сонгон шалгаруулалтыг эрчимжүүлэх, аж ахуйн нэгжүүдээс талбайн санал авах цахим механизмыг бүрдүүлэхийг чиглэл болгосон байна.

    Хууль, эрх зүйн шинэчлэлийн хүрээнд Ашигт малтмалын тухай хууль батлагдсантай холбогдуулан дүрэм, журмыг шинэчлэх, хүчингүй болох журмуудын талаар танилцуулах ажлыг зохион байгуулахын зэрэгцээ Түгээмэл тархацтай ашигт малтмал, Газрын тос, Газрын тосны бүтээгдэхүүн болон Хүнд үйлдвэрлэлийн тухай хуулийн төслүүдийн ажлыг эрчимжүүлэхээр болжээ. Үйлдвэржилтийн төслүүдийн хүрээнд гангийн үйлдвэр, алт цэвэршүүлэх болон зэс боловсруулах үйлдвэрийн сонгон шалгаруулалт, холбогдох бэлтгэл ажлыг эрчимжүүлэх, Налайхын үйлдвэрлэл, технологийн парктай холбоотой бодлогын зохицуулалтыг тодорхой болгох чиглэлээр бусад яамтай уялдаа холбоотой ажиллахыг үүрэг болгожээ.

     Түүнчлэн уул уурхайн үйл ажиллагаанд тавих хяналтыг сайжруулж, осол, зөрчлийг шуурхай мэдээлэх нэгдсэн систем бий болгох шаардлагатайг онцолсон байна. Авлигын эсрэг төлөвлөгөө боловсруулж хэрэгжүүлэх, Шилэн дансны тухай хуулийн хэрэгжилтийг хангах, санхүүгийн сахилга батыг сайжруулах, гүйцэтгэлийн аудитын шаардлагыг бүрэн хангаж ажиллахыг үүрэг болгосон байна. Мөн Монгол Улсын боомтуудын аюултай ачаа тээвэрлэх боломж, эдийн засгийн ач холбогдлын талаар нэгдсэн судалгаа гаргах, Эрдэс баялгийн мэргэжлийн зөвлөлийн хурлын тов, үр дүнг олон нийтэд тогтмол мэдээлэх, гадаад хамтын ажиллагааны хүрээнд байгуулсан санамж бичиг, тохиролцооны хэрэгжилтийг нэгтгэн тайлагнах чиглэл өгчээ.

      Ерөнхий сайдын санаачилсан “За бол заавал хий” хөдөлгөөний хүрээнд уул уурхайн салбарын аюулгүй ажиллагаанд анхаарч, холбогдох бодлого, төлөвлөгөө боловсруулан ажиллахыг мөн үүрэг болгосон байна. Төрийн нарийн бичгийн дарга Б.Дашпүрэв өгсөн үүрэг, чиглэлийн хэрэгжилтийг тогтоосон хугацаанд хангаж, бодит үр дүнгээр тайлагнахыг яам болон харьяа байгууллагуудын удирдлагуудад үүрэг болгожээ.