Элсэлтийн ерөнхий шалгалтын талаар Боловсролын үнэлгээний төвөөс мэдээлэл хийлээ. Энэ үеэр Боловсролын үнэлгээний төвийн хэлтсийн дарга Л.Ганбат "Элсэлтийн ерөнхий шалгалтыг зургадугаар сарын дундуур, монгол хэлний шалгалтыг тавдугаар сард зохион байгуулахаар төлөвлөж байна. Халдварын нөхцөл байдлаас шалтгаалж хугацааг товлоно. Боловсролын үнэлгээний төвөөс чат бот ашиглалтад оруулсан. Элсэлтийн ерөнхий шалгалтад оролцогчид өөрийн гэсэн и-мэйл хаягтай байх чухал. Энэ жил 100 орчим шалгалтын байрыг бэлдэж байгаа.

Нэг шалгалт 5800, батламж хуудас 700 төгрөгийн үнэтэй. Сүүлийн хоёр жилд элсэлтийн ерөнхий шалгалтад шууд буюу цахим засалтыг нэвтрүүлсэн. Тодруулбал, шалгалт дууссаны дараа засалтыг шууд хийж, лайваар олон нийтэд үзүүлнэ. Энэ үйл явцыг бүх хүнд нээлттэй харах боломжтойгоороо онцлогтой. Лайвыг хадгалах учраас эцэг, эхчүүд, шалгуулагчид дараа нь нөхөж үзэж болно.

Бүх шалгуулагч монгол хэл, бичгийн шалгалт өгсөн байх ёстой.  Тодорхой онооны шалгуур хангасны дараа элсэлтийн ерөнхий шалгалт өгөх эрхтэй. Шалгалтын батламжийн хугацаа нь дуусаагүй буюу 2.5 жилд онооны түвшин хүрч байвал монгол хэл, бичгийн шалгалтыг энэ жил өгөхгүй байж болно” гэлээ.

Шалгуулагчид бүртгүүлэхдээ дараах бичиг баримтыг бүрдүүлсэн байна. Үүнд: 
1. Цахим үнэмлэх болон түүнтэй адилтгах баримт бичиг /ТҮЦ машинаас авсан лавлагаа, төрсний гэрчилгээ, гадаад паспорт, цагдаагийн үнэмлэх, мөн гадаадын иргэний Монгол Улсад оршин суух түр үнэмлэх/
2. Өнгөт цээж зураг файлаар /цээж зураг нь 3*4 хэмжээтэй, сүүлийн 3 сарын дотор авхуулсан, урагшаа цэх харсан, арын фон нь цайвар цулгуй өнгийн, нарны шил болон малгайгүй байна/
3. Банкны интернэт гүйлгээ хийх эрхтэй төлбөрийн хэрэгсэл 
4. Бүрэн дунд боловсролын үнэмлэх ба түүнтэй дүйцэхүйц боловсрол эзэмшсэнийг баталгаажуулан эрх бүхий байгууллагаас олгосон баримт бичиг /энэхүү заалт нь зөвхөн өмнөх онд төгссөн ба гадаадад суралцаж дүйцүүлсэн шалгуулагчид хамаарна/
5. И-мэйл хаяг /шалгуулагч бүр зөвхөн өөрийн и-мэйл хаягаар бүртгүүлнэ/

Боловсролын үнэлгээний төвийн "ЦАХИМ ЗӨВЛӨХ" портал сайт http://help.eec.mn нь элсэлтийн ерөнхий шалгалтад бэлтгэж буй ерөнхий боловсролын сургуулийн арванхоёрдугаар ангийн суралцагчид болон багш нарт туслах зорилготой цахим зөвлөх хуудас юм.  Элсэлтийн ерөнхий шалгалтын бүртгэл хоёрдугаар сарын 25-наас дөрөвдүгээр сарын 20-н хүртэл үргэлжилнэ.