Баянзүрх дүүргийн Засаг дарга Н.Баярмөнх энэ сарын 21, 22-ны өдөр Баянзүрх дүүргийн хэмжээнд зохион байгуулагдах “Нэг өрх-Нэг шинжилгээ” аяны талаар мэдээлэл өглөө.

Тэрбээр “Өнгөрсөн хугацаанд Баянзүрх дүүрэгт гарсан коронавирусийн халдварын голомтуудыг Эрүүл мэндийн эмч, ажилчид, цагдаагийн байгууллага, олон түмний хүчээр хумиж чадсан. Энэ сарын 8, 9, 10-ны өдөр Дүүргийн орон нутагт амьдардаг 6341 төрийн албан хаагчдаас шинжилгээ авсан. Мөн 11, 12, 13-нд түүврийн аргаар 30481 хүнийг шинжилгээнд хамрууллаа. 14, 15, 16, 17-нд зөвшөөрөгдсөн зарим байгууллагын 22141 иргэнийг шинжилгээнд хамруулсан юм. Баянзүрх дүүрэг 104 мянга гаруй өрхтэй. Одоогийн байдлаар 45800 иргэнийг шинжилгээнд хамруулах шаардлагатай байна. Шинжилгээ авах явцад хүндрэлтэй зүйл тохиолдож байна. Тухайлбал, иргэд оршин суух хаяг дээрээ байхгүй байна. Тийм учраас дүүрэг, хорооны тусгай утасны дугаар руу залгаж өөрсдийгөө хаана байгааг мэдэгдэх хэрэгтэй. Дүүргийн Онцгой комиссоос 147 баг ажиллуулахаар төлөвлөж байна. Түүнээс 139 явуулын болон найман цэг дээр шинжилгээ авна" гэв.