Цагдаагийн ерөнхий газраас мэдээлэл өглөө. Ингэхдээ нэр бүхий иргэдээс цахим орчныг ашиглан төрийн өндөр албан тушаалтны нэр төрд халдсан гэмт хэргийн мөрдөн шалгах ажиллагаа явуулж байгаа тухай мэдээллийг Эрүүгийн хэрэг, хянан шийдвэрлэх тухай хуулийн 29 дүгээр зүйлийн 5-ын 3-т заасан прокурорын олгосон зөвшөөрлийн хүрээнд мэдээллийг өгч байгаа гэдгээ мэдэгдсэн юм.

         Ингээд ЦЕГ-ын Мөрдөн байцаах албаны дарга, цагдаагийн хурандаа П.Очбадрах мэдээлэл өглөө. Тэрбээр "Фэйсбүүк олон нийтийн цахим сүлжээнд Эрүүгийн хуулийн 13 дугаар зүйлийн арван дөрвийн 1-т заасан худал мэдээллийг олон нийтэд тараасан нэр бүхий иргэдийн нэр төр, алдар хүндэд халдсан гэх гэмт хэргийн талаарх гомдол мэдээлэл ирүүлсэн. Мөрдөн байцаах албаны Хүний халдашгүй байдлын гэмт хэрэг мөрдөн шалгах хэлтэс тус гэмт хэргийн талаарх гомдол мэдээллийг авч мөрдөн шалгах ажиллагаа явуулж байна. Мөрдөн шалгах ажиллагааны явцад урьдчилсан байдлаар иргэн Э нь телеграмм, вайбар аппликэйшн ашиглаж, Херо 9911, U bro, Bruno bro гэх хаягтай хэрэглэгч нартай тус тус харилцсан, улс төрийн өндөр албан тушаалтай хүмүүсийн зураг, бичлэг, дуу дүрсний эвлүүлэг хийн бэлтгэж, олон нийтэд зохион байгуулалттайгаар тарааж, тэднийг нийгэмд харлуулах, буруу ташаа мэдээллээр иргэдийг төөрөгдүүлэх үйл ажиллагаа явуулж байгаа нь мөрдөн шалгах ажиллагааны явцад тогтоогдож байна. Иймд иргэн Э-д холбогдуулж, Эрүүгийн хуулийн 13 дугаар зүйлийн арван дөрвийн 1-т зааснаар худал мэдээлэл тараасан гэх үндэслэлээр бид Эрүүгийн хэрэг үүсгэж, яллагдагчаар татаж, мөрдөн шалгах ажиллагааг явуулж байна. Дээрх нэр бүхий этгээдүүд нь зориудаар худал мэдээллийг бэлтгэж байгаа нь олон нийтийн буюу иргэдийн үндсэн хуулиар олгогдсон эрх, эрх чөлөөг хохироож мэдээллийн төөрөгдөлд оруулан, оюун санаа бодлыг талцуулах, нийгэмд сөрөг хандлагыг бий болгох аюултай үйлдэл байна. Энэ үйлдэл нь Монгол Улсын Үндсэн хуулийн 19 дүгээр зүйлийн арван есийн 3-т заасны дагуу хүний эрх чөлөөг эдлэхдээ үндэсний аюулгүй байдал, бусад хүний эрх, эрх чөлөөг хохироож, нийгмийн хэв журмыг гажуудуулж болохгүй гэсэн заалтыг зөрчсөн байна" гэв.