Гэмтэл, согог судлалын үндэсний төвд өнгөрсөн 24 цагийн хугацаанд Хүлээн авах, яаралтай түргэн тусламжийн тасгаар 132 хүн үйлчлүүлсэн байна. Амбулаторийн үзлэгт 82, яаралтай мэс засал гурав, төлөвлөгөөт мэс засал 17, хэвтэн эмчлүүлэгч 170, эрчимт эмчилгээнд 11 хүн орсон байна. Мөн эмчид үзүүлэхээр 1800-0119 утсанд дөрвөн дуудлага иржээ. Он гарснаас хойш эцэг, эхчүүдийн хайхрамжгүй, болгоомжгүй, хэнэггүй үйлдлээс шалтгаалан ахуйн хүрээний осол гэмтэл нэмэгдсэн байна. Тухайлбал, бага насны хүүхэд ор, сандлаас унаж бэртэх, гар, хуруугаа түлэх, мөсөн дээр тоглож байгаад халтирч унан гар, хөлөө хугалах тохиолдол их гарчээ. Тиймээс эцэг, эх, асран хамгаалагчид өөрсдөө болон бага насны хүүхдийг аливаа эрсдэлд оруулахаас урьдчилан сэргийлж, анхаарал болгоомжтой байхыг Гэмтэл, согог судлалын үндэсний төвөөс анхаарууллаа.