Бие даалтын долоо хоног бол сурагч бүрийн хувьд өөрийгөө хөгжүүлэх, шинэ зүйл сурах онцгой боломж. Энэ хугацаанд зөвхөн номын хуудсанд бус, бодит ертөнцөөс мэдлэг авах хамгийн сонирхолтой арга нь аялал, ажиглалт, туршлага юм. Тиймээс энэ удаад бид сурагчид бие даалтын долоо хоногтоо зочлох боломжтой сонирхолтой музейнүүд болон хийж болох бүтээлч санаануудыг танилцуулж байна.

 Монгол Улсын Хүүхэлдэйн театр 

     Монгол Улсын Хүүхэлдэйн театр нь 1948 онд байгуулагдсан бөгөөд 77 жилийн турш хүүхэлдэйн урлагийн уламжлал, соёлыг хөгжүүлэн, хүүхэд багачуудын гоо зүй, ёс суртахуун, урлагийн боловсролыг дэмжин ажиллаж ирсэн үндэсний хэмжээний мэргэжлийн байгууллага юм.

• “Бие даалтын 7 хоног”-ийн хүрээнд сурагчдын сэтгэлзүйн тогтвортой байдлыг дэмжих, эерэг хандлага, бүтээлч сэтгэлгээг төлөвшүүлэх зорилгоор театрын уран бүтээлчид дараах жүжгүүдийг толилуулж байна.
• “Миний хөөрхөн шүдний аялал”
• Хүүхдийн инээмсэглэл, эрүүл мэндийн зөв дадлыг уран сайхны аргаар харуулсан энэхүү жүжиг нь өөрийгөө арчлах, зөв дадал хэвшлийг бий болгох сэдлийг төрүүлнэ. 
• “Морин хуур”
• Монгол ардын “Хөхөө Намжил” үлгэрээс сэдэвлэсэн энэ бүтээл нь хайр, итгэл, урлагийн хүчийг илэрхийлж, үндэсний бахархлыг хүүхдийн зүрхэнд шингээсэн уран сайхны тууль юм. 
• “Одиссей”
• Эртний Грекийн алдарт баатар Одиссейн урт аяллын түүхийг хүүхэлдэйн хэлбэрээр анх удаа амилуулсан бүтээл. Энэхүү жүжиг нь зориг, тэвчээр, итгэлийн үнэ цэнийг ойлгуулж, сэтгэлзүйн урам зориг өгөх зорилготой. 
•  Хүүхэлдэйн урлаг нь амьгүйг амилуулж, хүүхдийн төсөөлөл, сэтгэл хөдлөл, урам зоригийг хөгжүүлдэг хамгийн эерэг нөлөөтэй урлаг юм.
• Эдгээр жүжгүүдээр дамжуулан сурагчид урлагаар сэтгэлээ тэжээж, сэтгэлзүйн хувьд тайвширч, инээмсэглэлээр дүүрэн “Бие даалтын 7 хоног”-ийг төлөвлөх боломжтой.

Номын сантай танилцах хөтөлбөр 

         Монгол Улсын Үндэсний номын сангийн салбар шинэ номын сангаас ерөнхий боловсролын сургуулийн сурагчдад зориулан “Номын сантай танилцах” хөтөлбөрийг хэрэгжүүлж байна.

• Хөтөлбөрийн хүрээнд сурагчид номын сангийн бүтэц, уншлагын орчин, боловсролын болон соёлын хөтөлбөрүүдтэй танилцаж, мэдлэгийн орон зайд аялж, бүтээлч оролцоогоо нэмэгдүүлэх боломжтой.
• Энэ удаагийн “Бие даалтын 7 хоног” нь сурагчдын сэтгэл зүйн тогтвортой байдлыг дэмжих, эерэг харилцаа, урам зоригийг нэмэгдүүлэх чиглэлд зохион байгуулагдаж байгаа тул сургуулиуд сурагчдын бие даалтын үйл ажиллагаандаа номын сантай танилцах хөтөлбөрийг уялдуулан төлөвлөх боломжтой. 

Хүүхдийн төв номын сангийн танилцуулга

        Монгол Улсын Хүүхдийн төв номын сан нь 6 уншлагын танхим, 100 гаруй мянган ном хэвлэлтэй бөгөөд хүүхэд багачууд, өсвөр үеийнхэн болон насанд хүрэгчдэд уншлага, боловсрол, соёлын чиглэлээр үйлчилдэг үндэсний хэмжээний байгууллага юм. Ном уншлагаас гадна тус номын сангаас сургалт, бүтээлч ажил, соёлын үзэсгэлэн, аялал, тэмцээн уралдаан, соёлын өвийг танин мэдүүлэх хөтөлбөрүүд зэрэг олон талт үйл ажиллагаа тогтмол зохион байгуулдаг.

• Энэ удаагийн “Бие даалтын 7 хоног” нь сурагчдын сэтгэл зүйн тогтвортой байдлыг дэмжих, эерэг харилцааг төлөвшүүлэх, бүтээлч орчныг бий болгох зорилготой явагдаж байгаа тул сургуулиуд сурагчдаа Хүүхдийн төв номын сангийн орчин, үйл ажиллагаатай танилцах аялал, “Үлэг гүрвэл”, “Өв соёл” зэрэг танин мэдэхүйн хөтөлбөр, мөн сэтгэл зүйн сургалт, бүтээлч ажлуудад хамруулах байдлаар төлөвлөх боломжтой. 
• Ийм төрлийн орчинд сурагчид хамтдаа суралцаж, сэтгэлзүйгээ дэмжих, урам зориг авах, өөрийгөө илэрхийлэх шинэ боломжийг олж авдаг билээ. 

БАЙГАЛИЙН ТҮҮХИЙН МУЗЕЙ

Боловсролын сайдын 2025 оны хоёрдугаар дугаар сарын 27-ны өдрийн “Хичээлийн жилийн бүтэц шинэчлэн батлах тухай” А/95 дугаар тушаалаар 2025-2026 оны нийслэл болон аймаг, сумын ерөнхий боловсролын сургуулийн хичээлийн жилийн бүтэц батлагдсан бөгөөд 10 дугаар сарын 22-24-ний өдрүүдэд бие даалтын 7 хоног болно. 

2025-2026 оны хичээлийн жилийн бие даалтын 7 хоногийн турш Мягмар-Баасан гарагуудад 09:00-12:00, 14:00-16:00 цагуудад Байгалийн түүхийн музей хүүхэд багачууд та бүхнийг музейн оролцоот боловсролын хөтөлбөрт хамрагдахыг урьж байна. 

ДҮРСЛЭХ УРЛАГИЙН МУЗЕЙ

"БИЕ ДААЛТ"-ын долоо хоногт зориулан анги, хамт олон, найз нөхөд, гэр бүлээрээ Монголын дүрслэх урлагийн гайхамшигт өв соёлтой танилцан, шинийг сурч мэдэх "МУЗЕЙН БОЛОВСРОЛЫН ХӨТӨЛБӨР"-тэй танилцаарай. 

БОГД ХААНЫ ОРДОН МУЗЕЙ

      Монгол улсын эзэн хаан VIII Богд Жавзандамба хутагт дөрвөн ордонтой байсан ба бидний үед хадгалагдан үлдсэн нь Ногоон ордон цогцолбор юм. Энэхүү ордонд Богд Хааны Ордон музей үйл ажиллагаагаа явуулдаг. Богд Хааны Ордон музей нь Монгол улсын төрийн  тусгай хамгаалалт  байдаг XIX  зууны сүүлч ХХ зууны эхэн үеийн түүх, шашин соёл, уран барилгын дахин давтагдашгүй соёлын өв бүхий онцгой  дурсгалт газар юм. Монгол улсын музейн түүхэн дэх анхдагч музей билээ. 

Цагийн хуваарь өвлийн улиралд: Есдүгээр сарын 16 – тавдугаар сарын 14-н хүртэл өдөр бүр 09:00-17:00 

УЛААНБААТАР ХОТЫН МУЗЕЙ

       ХХ зууны эхэн үед Их хүрээнд Оросын Буриад худалдаачид худалдаа, сууцын зориулалтаар олон байшин барьсан бөгөөд тэдгээрийн нэг нь 1918-1919 онд баригдсан Цогт Гармаевич Бадамжавын байшин юм. Тухайн үеийн Их хүрээний чамин тансаг байшингуудын нэг болж байсан тус байшинг Цогтбадамжав өөрийн хувийн сууцын зориулалтаар барьжээ.  Цогтбадамжав байшингаа хийц, загварын хувьд чамин өвөрмөц төрхтэйгөөр хийснээс гадна байшингынхаа орой дээр Оросын хаан ширээ унахыг бэлгэдэн гар гараасаа хөтлөлцөн алхах ардуудыг модоор сийлсэн ширээний дөрвөн хөлийг дээш харуулж байрлуулсан нь хувьсгалт дэвшилт үзэлтэй хүн байсныг нь илтгэдэг. Музейн сан хөмрөг 3300 гаруй үзмэртэйгээс үзүүлэнгийн танхимуудад нийт үзмэрийн гуравны нэг нь дэлгэгдэж, үзэгчдийн хүртээл болж байна. 

ЧИНГИС ХААН ҮНДЭСНИЙ МУЗЕЙ 

        Чингис хаан Үндэсний музей нь орчин үеийн дэлхийн жишигт нийцсэн стандарт шаардлага, техник, тоног төхөөрөмжөөр хангагдсан, 6 том байнгын үзэсгэлэнгийн танхимтай, хурлын заал, тусгай үзэсгэлэнгийн танхим, хүндэтгэлийн өргөө, виртуал өрөө, тусгай үзэсгэлэнгийн танхимууд, номын сантай.  Тус музей нь Чингис хаанаас өмнөх цаг үеийн эртний төрт улсууд, Монголын эзэнт гүрний үе, Их хааны угсааныхны үе гэсэн гурван үндсэн хэсгээс бүрдэнэ.  Монголын төрт улсын түүхийг бүрэн харуулсан, нийт үзмэрийн 90 гаруй хувь нь эх оргинал үзмэр, AR, VR зэрэг технологийн шийдлийг ашигласан музей юм.