“Анхны хайр хүчтэй

Анхны дурлал ариухан...” гэж дуулах цээл хоолойт “хүү”-г өдгөө мэдэхгүй хүн байхгүй. Хүний амьдралын хамгийн нандин үеийг хөглөн эгшиглэх энэ дуу ч монголчуудын сэтгэл зүрхэнд мөнхөд эгшиглэдэг. Н.Өнөдэлгэр ганц “Анхны хайр”-аар ч зогсохгүй зүүд, зүрхний наран болсон аавуудаа ч хайрлан дуулсан.

         “UBS” телевизийн “Universe best songs-2010” наадмын шилдэг оролцогчдын нэгээр шалгарч, хит дуунуудаа хүргэж эхэлсэн тэрбээр харин “Зүүдний наран” дуунаасаа хойш сурах, боловсрох тал дээрээ анхаарч, уран бүтээлээсээ хэсэгтээ хөндийрсөн байдаг. Ингээд 2022 онд эргэн ирж байгаагаа мэдэгдэж, дуугаа дуулж эхэлсэн. Түүний дуулах энэ авьяас нь дуурийн дуучин ааваас нь эхлэлтэй юм билээ. Аав нь Баянхонгор аймгийн Хөгжимт драмын театрт дуулаачаар ажиллаж байгаад 1996 онд хотод орж ирээд, 2001 он хүртэл Дуурийн театрт ажиллаж байсан гэдэг. Тиймдээ ч аавынхаа хүсэл мөрөөдлийг үргэлжлүүлэх, нэрийг нь өндөрт өргөх үүрэг түүнд бий учир урлагтаа үнэнч байж, өөрийгөө сорьж, дуулах нөөц чадвараа улам хөгжүүлж, дайчилж, тууштай байхаар зорьсон тухайгаа ч бидэнд  урам зориг дүүрэн ярьж байсан. Ах, эгчийнхээ зааж өгсөн дууг дуулж урлагийн үзлэгт орж байр эзэлдэг хөвгүүн байхаасаа л тэр дуулах сонирхолдоо хөтлөгдсөөр өнөөдрийг хүрч яваа аж.

       Ингээд харахаар бага насныхаа хүсэл мөрөөдлийг биелүүлэх, “Хүү нь ард түмний хайртай дуучин болсон шүү” гэдгийг аавдаа харуулах урт зам түүнд байгаа юм.

 Гэвч харамсалтай нь, саяхан л дуугаа дуулж, бусдад аз жаргал, хайр, дурсамжийг түгээж байсан тэр Монголд онош нь тогтоогдох, эмчлэгдэх боломжгүй хүнд өвчнөөр өвдөж, БНХАУ-ын гуравдугаар зэрэглэлийн эмнэлэгт яаралтай хэвтэн эмчлүүлэх шаардлагатай болсноо дуулгалаа. Урлаг соёлынхон, монголчууд ч дуучиндаа туслаж, дуу хуураар нь тэтгэн тэнхэрдгийнхээ хариуг барих бололтой. Цөм л зар, мэдээ түгээж, хуваалцаж байна.

    Тийм ээ, амьдралын замд тулгарах өвдөлт, зовлонг зоригтойхон давж гараад, хүсэл мөрөөдлөө заавал биелүүлэх өдөр чамд ирнэ ээ, Н.Өнөдэлгэр ээ. Тэр хүртэл тэвчээртэй байгаарай.  Ард түмнийг тийм сайхан хоолой, хит дуунуудаараа амьдралынх нь туршид уяраан хөглөж, сэтгэлийг нь амраан жаргаасан юм чинь эдгэнэ ээ. Аялгуут дуу, ард түмий сэтгэлийн дэм шиг эдгээгч эм, анагаагч ухаан үгүй. Тиймээс тэнхээтэй байж, даван туулаарай. Өвчнөө ялан дийлж босож ирээд, аав шигээ дуучин, бүр ааваасаа ч давсан уран бүтээлч болж, өшөө ч олон хит дуугаараа хүмүүсийн сэтгэл зүрхийг баясгана гэдэгт итгэлтэй байна. Монголчууд Н.Өнөдэлгэртээ хайртай, халуун сэтгэлээ ч харамгүй зориулна.

    "Өвсний толгойд шүүдэр хяруусаад

    Өмөг түшиг аавыгаа үгүйлэх юм

     Сэтгэлд ургасан зүүдний наранд тань

     Сэвлэг даахь минь нялхаараа л явна даа..." гэх сэтгэлд ойр дуу чинь өнөөдөр ч аавыгаа дурссан олон хүний сэтгэлд дотноор эгшиглэж байна. Эдгэж босоод, ийм сайхан дуу олныг хийж, хүний амьдралын жаргал, зовлонг дуу хуураараа жаргаагаарай. Нэг тийм цээл, дотно, сэтгэлд хүрсэн хоолой чинийх шүү.

Халуун сэтгэлээ харамгүй дэлгээрэй. Данс: MN 38000500 5031608154 /Н.Өнөдэлгэр/