УИХ-ын дарга Д.Амарбаясгалан үүсээд буй нөхцөл байдалтай холбоотойгоор мэдээлэл өгч байна.

Тэрбээр “МАН-ын даргын сонгууль болсонтой холбоотойгоор улс төрийн асуудлууд үүсэж байна. Би МАН-ын даргад нэр дэвшихдээ хувь хүн биш хууль засагладаг эрх зүйт төрийг бий болгохын төлөө, МАН хувь хүнийг бус хамтын удирдлагын байгууллагыг хэвээр хадгалахын төлөө, Азийн цээжинд орших ардчилсан Монгол Улс парламентынхаа засаглал, дархлааг улам бүр бэхжүүлэхийн төлөө МАН-ын даргад нэр дэвшсэн. МАН-ын наймдугаар Бага хурал хуралдаж, гишүүдийн олонхын саналаар би МАН-ын даргаар сонгогдсон. Сонгуульд хамт өрсөлдсөн журмын нөхөр маань ялагдлаа хүлээн зөвшөөрөхгүй байгаагаас үүдэлтэй сүүлийн өдрүүдэд гүйцэтгэх засаглалын зүгээс зохисгүй олон үндэслэл баримтгүй зүйлээр гүтгэж, олон нийтийн төөрөгдүүлж байна. Парламент Монголын Улсын тарийн эрх барих дээд байгууллага байдаг. Харамсалтай нь сүүлийн өдрүүдэд гүйцэтгэх засаглалын зүгээс надаар дамжуулж парламентын үйл ажиллагааг доголдуулах үйл ажиллагаа явуулж байна. Хамгийн тод жишээ, дөнгөж сая Хууль зүйн байнгын хороо хаалаа, өнөөдөр 15:00 цагаас Хууль зүйн байнгын хороо хурлаа эхлүүлсэн.  Засгийн газар болон бусад УИХ-ын гишүүдээс магадгүй гүйцэтгэх засаглалын тэргүүнээс авч байгаа дарамтаас хамааралтайгаар Хууль байнгын хорооны хурлыг хуралдуулалгүй бойкот хийлээ. Арван гишүүн ирц бүртгүүлээд, хоёр цаг хүлээгээд хурал болсонгүй. Монголын ард түмэн хэвлэлээр ээлж дараалан хийж байгаа мэдэгдлээс мэдээлэл авахаас илүүтэй мэргэжлийн хороон дээр хууль хяналтын байгууллагын удирдлагууд ирж болж байгаа нөхцөл, үйл явдал дээр бодитой хариу өгөх нь нэн чухал гэж үзэн энэ Хууль зүйн байнгын хорооны хурлыг зарласан. Намайг гүтгэсэн этгээдүүд энэ хуралд ирээгүйн улмаас хуралдаж чадсангүй.