УИХ-ын дарга Д.Амарбаясгалан цаг үеийн асуудлаар сэтгүүлчидтэй нээлттэй ярилцлага хийж байна. Энэ үеэр “АТГ сайн дураараа өөрөө хүсэлт өгч шалгуулах уу. МАН-ын даргыг сонгох чухал үеийн өмнө ийм асуудал гарч байгаа нь танай намыг хагаралтай байгаа гэж харж байна. Энэ тал дээр ямар бодолтой байгаа вэ” гэх асуултад дараах хариултыг өглөө.

                Тэрбээр “Х.Мандахбаяр, сэтгүүлч Н.Өнөрцэцэгтэй  намайг холбож байсныг АТГаас хамааралгүй гэсэн хариу ирсэн. Шүүхэд хандсан шүүхийн шийдвэр гарсан. “Админерал” ХХК-тай Д.Амарбаясгалан ямар нэгэн харилцаа холбоогүй гэсэн анхан шатны шүүхийн шийдвэр гарсан. Би ЗГХЭГ-ын дарга байх үеэсээ эдгээр асуудалтай холбогдсоны улмаас долоон удаа цагдаа, тагнуул, шүүх гэсэн байгууллагуудад гомдол гаргасан. Харамсалтай нь өнөөдрийг хүртэл миний гаргасан гомдлуудыг авч хэлэлцэж, хариу өгөөгүй. Энэ бүхний ард улс төр байгаа гэдгийг ойлгож байгаа. МАН-д хагарал байна. Энэ хагарлын эздийг Ерөнхий сайд Г.Занданшатар, МАН-ын Ерөнхий нарийн бичгийн Дарга Я.Содбаатар, Гадаад хэргийн сайд Б.Батцэцэг, ХААХҮ-ийн сайд Ж.Энхбаяр, өчигдөр мэдэгдэл хийсэн Б.Энхбаяр нарын хов зөөж, амь зогоодог хүмүүсийн хийдэг ажил гэж боддог. Намайг Ерөнхий нарийн бичгийн даргаар ажилласан найман жилийн хугацаанд МАН хагараагүй шүү. Я.Содбаатарыг Ерөнхий нарийн бичиг болсон арван сарын хугацаанд МАН төрийн өндөрлөгийн түвшинд хагарал бий болж байна. Энэ бол ховч хүмүүсийн хийсэн ажил. Өчигдөр орой 19:30 цагт АТГ 20 байцаагчийг цуглуулаад Д.Амарбаясгалангийн талд санал өгөх гэж байгаа бага хурлын гишүүдийг 20, 20-иор нь жагсааж байгаад түүх архив үүсгэх гэж үзсэн. Би энэ асуудлаар Ерөнхий нарийн бичгийн дарга Я.Содбаатартай уулзаж “Намын асуудал нам дотроо дуусах хэрэгтэй. Намайг дэмжинэ гэсэн бага хурлын гишүүдэд хавтаст хэрэг нээж, түүх судлах замаар дарамт үзүүлэх гэж байгаа бол би энэ дээр тултлаа үзнэ” гэж хэлсэн. Үүнээс хойш 20 минутын дараа АТГ хийж байсан ажлаа зогсоосон. Надад баримт, гэрч байгаа. Энэ бүх юм хэрээс хэтэрснийг харуулж байна. Б.Энхбаярын надад өширхөөд байгаа нэг шалтгаан нь Н.Өнөрцэцэгийг барьж хорих гэж байхад нь “Боль, бид энэ замаар явж болохгүй”гэдэг байр суурийг илэрхийлсэнд байгаа байх. Тэр үед намын дарга байсан Л.Оюун-Эрдэнэ “Бид ийм замаар явах гэж байгаа бол бүгд ажлаа өгөөд энэ төрөөс зайлцгаая” гэж хэлсэн. Харамсалтай нь, шоронд суусан, өчнөөн ам, өчиг өгч байж суллагдсан” гэв.