Засгийн газрын ээлжит хуралдаан өнөөдөр болж, Ерөнхий сайд Г.Занданшатар танхимын зарим сайд нарын хамт Засгийн газрын 100 хоногийн ажлын үр дүн болон ирэх таван жилийн хөгжлийн үндсэн чиглэлээ танилцууллаа.

Тэрбээр “Засгийн газар эдийн засгийн хүнд үед байгуулагдсан бөгөөд нүүрсний үнэ хоёр дахин буурч, экспорт 15 хувиар унаснаас төсвийн орлого 3.3 их наядаар тасарсан. Энэ нөхцөлд долоо хоногийн дотор төсвийн хэмнэлтийн тодотголыг өргөн барьж, эдийн засгийн өсөлтийг сэргээсэн. Тухайн хугацаанд валютын нөөц 5.7 тэрбум ам.доллар болж өсч, эдийн засгийн өсөлт 5.6 хувьтай гарсан бөгөөд олон улсын байгууллагууд төсвийн тодотголыг өндрөөр үнэлж, зээлжих зэрэглэлийг хэвээр үлдсэн. Мөн 2.2 их наяд төгрөгийн үргүй зардлыг хэмнэж, төрийн албаны дарга нарын тоог цөөлж, нэг удаагийн болон хэрэгжээгүй төсөл хөтөлбөрөөс нийт 987 тэрбум төгрөгийг хэмнэсэн. И-баримт системийг цахим хэлбэрт шилжүүлж, НӨАТ-ын буцаан олголтыг нийт иргэдийн 80 хувьд олгох системийг нэвтрүүлсэн. Дөрвөн ам бүлтэй айл жилдээ хоёр сая гаруй төгрөгийг буцаан авдаг болно. Иргэдийн санал, гомдлыг шийдвэрлэх D-government.mn платформыг байгуулсан. Хиймэл оюун ухааны үндэсний стратегийг баталж, виртуал татварын бүсийг байгуулсан. Үндэсний баялгийн сангийн хууль хэрэгжиж, стратегийн орд газруудын өгөөжийг төвлөрүүлж, ард түмэнд хүртээж эхэлсэн. Шинээр 357 сая тонн нөөцтэй зэсийн ордыг илрүүлсэн. “Эрдэнэс Тавантолгой”-д онцгой дэглэм тогтоосноор хоёр сарын хугацаанд үр ашиг 3, нүүрсний экспорт 1.6 дахин нэмэгдсэн. Наймдугаар сард төсөв 52 тэрбум төгрөгийн ашигтай гарсан. Эдгээр арга хэмжээнүүдээр эдийн засгийн хямралыг зогсоож, өсөлтийг бий болгосон. 100 хоногийн ажлын үр дүнг дүгнэж, ирэх таван жилийн үндсэн чиглэлийг “Шинэ итгэл, эрс шинэтгэл” нэртэйгээр танилцуулсан бөгөөд энэ нь 10 цогц реформыг агуулж байна” гэв.