Засгийн газрын ээлжит хуралдааны дараа Шадар сайд Н.Учрал 100 хоногийн ажлын талаар мэдээлэл өглөө.

Тэрбээр “Засгийн газар эдийн засгийн өсөлтийг хангах, гацаж байсан олон асуудлыг шийдвэрлэхэд анхаарсан. Ирэх аравдугаар сарын 31 гэхэд таван жилийн үндсэн хөгжлийн чиглэлийг өргөн барихаар бэлдэж байна. Энэ нь найман үндсэн чиглэлтэй бөгөөд хөрөнгө оруулалтын хөтөлбөрийг хавсралтаар дагалдуулна. Хөрөнгө оруулалтын хөтөлбөрийг ач холбогдлоор нь үнэлж, хэрэгжүүлэх төслүүдийг дөрвөн бүлэг, 15 оноогоор эрэмбэлэх тогтолцоонд шилжүүлнэ. Одоогоор 14 мега төслийг дөрвөн шатлалаар эрэмбэлсэн бөгөөд нийт 140 төслийг ирэх жилийн улсын төлөвлөгөөнд цэгцлэн оруулахаар ажиллаж байна. Аймаг, орон нутагт төслүүдийг бие дааж хөгжүүлэх боломжийг олгож, жил бүрийн төлөвлөгөөнд тусгагдаагүй төсөл хөтөлбөрийг хэрэгжүүлэхгүй байхыг онцоллоо. Салбар бүрийн таван жилийн хөгжлийн төлөвлөгөөг боловсруулж, бүх нийтийн оролцоог ханган, салбар салбарт индикаторуудыг зөв тогтоохоор ажиллана. Төсөв илүү ухаалаг, бодитой болохоор, орлого, зарлагыг уялдуулан төсвийн сахилга батыг сайжруулахад анхаарна. Татварын багц хууль, Гадаадын хөрөнгө оруулалтын хууль зэрэг хуулийг өргөн барьж, хувийн хэвшлийн эрх чөлөөг дэмжихээр ажиллана. Гаалийн үйл ажиллагааг цахимжуулж, экспортын ажлыг дэмжиж, эдийн засгийг идэвхжүүлэх бодлого хэрэгжүүлж байна. Ирэх жил Засгийн газар төсөл, хөтөлбөрүүдээ ач холбогдлоор эрэмбэлж, эдийн засгийн өсөлтийг дэмжих, хувийн хэвшлийн оролцоог нэмэгдүүлэх бодлого барина” гэв.