Монгол Улсад Япон улсын Шизуока мужийн их сургуулиудын төлөөлөгчид айлчилж байна. Шизуока мужийн Нийгмийн хамгааллын их сургуулийн захирал Сайто Цүёоши, багш Кидо, төлөвлөлтийн хэлтсийн мэргэжилтэн Сакүрай болон Шизуока аж үйлдвэрийн их сургуулийн сургалтын албаны дарга Ёшизоэ нар Монголд ирсэн юм. Боловсролын ерөнхий газрын дарга Т.Ням-Очир тэднийг хүлээн авч уулзаж, мэргэжлийн болон техникийн боловсролын сургалтын байгууллагын багш нарыг богино хугацааны сургалтаар чадавхжуулах, багш солилцооны хөтөлбөрт хамруулах, мэдээллийн технологи болон нийтийн эрүүл мэндийн чиглэлээр хамтран ажиллах боломжуудыг хэлэлцлээ.

Мөн тусгай хэрэгцээт иргэдийн асаргаа, нийгмийн эрүүл мэндийн судалгаа, боловсролын туршлага солилцох зэрэг олон талын хамтын ажиллагааны боломжуудыг ярилцсан байна. Энэхүү уулзалт нь Монгол, Япон улсын боловсролын салбарын хамтын ажиллагааг өргөжүүлэх, багш, судлаачдын чадавхийг дээшлүүлэх чухал алхам болжээ.