Хөвсгөл аймгийн Тариалан сумын нутагт самар түүж явсан иргэн сураггүй алга болсон хэрэг гарчээ.

 Тодруулбал, Тариалан сумын Давааны-Ар багийн “Дуургын нуруу” гэх газарт (аймгийн төвөөс зүүн хойд зүгт 230 км, Тосонцэнгэл сумаас зүүн хойд зүгт 130 км, Тариалан сумаас хойд зүгт 70 км) есдүгээр сарын 21-ний өдрийн 15:00–16:00 цагийн орчимд Тосонцэнгэл сумын харьяат дөрвөн хүн самар түүж явжээ. Иргэн Э. (46 настай, эмэгтэй) отгоосоо нэг км орчим зайд түүсэн самраа сахиж үлдсэн бөгөөд хамт явсан хүмүүс нь буцаж ирэхэд сураггүй болсон байна. Энэхүү хэрэг тухай дуудлага есдүгээр сарын 22-ны өдрийн 14:40 цагт Онцгой байдлын байгууллагад иржээ. 

Хөвсгөл аймгийн Онцгой байдлын газрын Эрэн хайх, аврах салбар, Тариалан сум дахь 46 дугаар ангийн алба хаагчид, Тосонцэнгэл сумын Мэргэжлийн анги, Тариалан сумын Засаг даргын Тамгын газрын ажилтнууд хамтран иргэн Э-г эрэн хайх, аврах ажиллагааг зохион байгуулж байгаа аж.