АНУ-ын Нью-Йорк хотноо өчигдөр НҮБ-ын Ерөнхий Ассамблейн 80 дугаар чуулганы Ерөнхий санал шүүмжлэл эхэллээ. Чуулганд НҮБ-ын гишүүн 150 гаруй орны төр, засгийн тэргүүн оролцож байна.

Монгол Улсын Ерөнхийлөгч У.Хүрэлсүх НҮБ-ын төв байранд хүрэлцэн ирэхэд НҮБ-ын Ерөнхий нарийн бичгийн дарга Антонио Гутерреш албан ёсоор угтан авч, Ерөнхий санал шүүмжлэлийн нээлтэд оролцуулав. Ерөнхийлөгч өнөөдөр хэлсэн үгэндээ олон улсын харилцааны тулгамдсан асуудлаар Монгол Улсын байр суурийг илэрхийлэхээр төлөвлөж байна.

Энэ удаагийн чуулган НҮБ байгуулагдсаны 80 жилийн ойтой давхцаж буйгаараа онцлог бөгөөд “Хамтдаа хүчтэй 80 жил: Энх тайван, хөгжил, дэвшил, хүний эрхийн төлөөх илүү сайхан ирээдүй” уриан дор зохион байгуулж байна.

Чуулганаар олон улсын энх тайван, аюулгүй байдал, зэвсэг хураах, энхийг сахиулах ажиллагаа, терроризмтой тэмцэх, тогтвортой хөгжил, уур амьсгалын өөрчлөлт, хүний эрх, хүмүүнлэгийн тусламж зэрэг дэлхий нийтийн өмнө тулгамдаж буй 174 багц асуудлыг хэлэлцэх юм.

НҮБ-ын Ерөнхий Ассамблейн 80 дугаар чуулган 2025 оны есдүгээр сарын 9-нөөс арванхоёрдугаар сарын сүүл хүртэл Нью-Йорк хотноо үргэлжилнэ. Энэ удаагийн чуулганы даргаар ХБНГУ-ын Гадаад хэргийн сайд асан Анналена Бербок ажиллаж байна. Чуулганы үндсэн зургаан хорооны үйл ажиллагаа ирэх аравдугаар сарын 6-нд эхлэхээр товлогджээ.