Улсын начин Ө.Батзул агсны амь нас хохирсон зам тээврийн ослын хэргийг шүүх хурал өнөөдөр Сэлэнгэ аймгийн Сайхан сум дахь сум дундын Эрүүгийн хэргийн анхан шатны шүүхэд болж, осол гаргасан жолоочид хоёр жилийн хорих ял оноож шийдвэрлэсэн. Тодруулбал, эсрэг урсгалаас ирж мөргөлдсөн автомашины жолооч Ц.Отгонбатыг Эрүүгийн хуулийн 27.10-3 дахь хэсэгт зааснаар тээврийн хэрэгслийн хөдөлгөөний аюулгүй байдал, ашиглалтын журам зөрчсөн хэрэгт буруутган, хоёр жилийн хорих ял оноосон юм.

    Үүнтэй холбоотойгоор, Улсын начин Ө.Батзул агсны эхнэр өөрийн цахим хуудсандаа, "Тийм ээ хүмүүсээ надад хэлэх ч үг олдохгүй байна. Хүний амийг үгүй хийчхээд хоёрхон жилийн ял авч байна. Чамайг ертөнцийн хууль шийтгэх болтугай" хэмээн бичжээ.

Хэргийг эргэн сануулбал, Орхон аймгийн Баян-Өндөр сумын харьяат, Улсын начин Ө.Батзул өнгөрсөн оны долдугаар сарын 30-ны өдөр зам тээврийн ослын улмаас амь насаа алдсан хэрэг гарсан.