HBO-ийн алдарт “Euphoria” цувралын гуравдугаар улирал 2026 оны хавар албан ёсоор нээлтээ хийхээр болжээ. Энэ нь 2022 онд гарсан хоёрдугаар улирлаас хойш дөрвөн жилийн дараах эргэн ирэлт болох юм.

Цувралын зураг авалт энэ оны хоёрдугаар сард эхэлсэн бөгөөд ирэх долоо хоногт дуусах төлөвтэй байна. “Euphoria”-ийн эхний хоёр улиралд Ру Беннетт (жүжигчин Зендая) ахлах сургуульд сурч байхдаа хар тамхины донтолт, хайр дурлал, найз нөхөрлөл, амьдралын утга учрыг олох оролдлого зэрэгтэй тулгарч буйг өгүүлсэн. Түүний ангийнхан Жюль Вон, Кэсси Ховард, Лекси Ховард, Нэйт Жейкобс, Мадди Перез зэрэг дүрүүдийн өөр өөрийн адармаатай амьдрал цувралын гол үйл явдлыг бүрдүүлдэг.

Гуравдугаар улирлын үйл явдлын талаар тодорхой мэдээлэл гараагүй байгаа ч өмнөх улирлын гол дүрийн жүжигчид эргэн ирэхээс гадна Испанийн дуучин Розалия, жүжигчин Шарон Стоун нар шинээр нэгдэж буй нь онцлох мэдээ болж байна.

“Euphoria” нь оюун санааны эрүүл мэнд, өсвөр үеийнхний сэтгэл зүйн сорил, өнөөгийн залуучуудын тулгамдсан асуудлыг хөндсөнөөрөө үзэгчдийн талархлыг хүлээсээр байгаа билээ.

Эх сурвалж: https://los40.com/2025/09/17/el-director-de-hbo-desvela-que-2026-comenzara-con-el-estreno-de-la-tercera-temporada-de-euphoria/