Монгол Улсын Засгийн газар, Бүгд Найрамдах Франц Улсын Засгийн газар хооронд байгуулсан санхүүгийн хэлэлцээрийн хүрээнд хэрэгжиж буй “Онцгой байдлын ерөнхий газарт гал унтраах тусгай зориулалтын автомашин нийлүүлэх II шатны төсөл”-ийн хүрээнд гал түймэр унтраах автомеханик шатны нийт дөрвөн шинэ автомашин хүлээн авлаа.

Төслийн хүрээнд нийлүүлсэн автомашинуудын дотор 42 метрийн урттай хоёр, 32 метрийн урттай хоёр шат бүхий автомеханик шатны автомашин багтаж байна. Шинээр нийлүүлсэн 42 метрийн автомашиныг НОБГ-ын Чингэлтэй дүүргийн Онцгой байдлын хэлтсийн Гал түймэр унтраах, аврах аравдугаар анги, Баянзүрх дүүргийн Онцгой байдлын хэлтсийн Гал түймэр унтраах, аврах 63 дугаар ангид хуваарилжээ. Харин 32 метрийн автомашиныг Баянхонгор аймгийн Онцгой байдлын газрын Гал түймэр унтраах, аврах 16 дугаар анги, Өвөрхангай аймгийн Онцгой байдлын газрын Гал түймэр унтраах, аврах 12 дугаар ангид тус тус хүлээлгэн өгчээ.

Автомашинуудын ашиглалт, засвар үйлчилгээний сургалтыг Францын “Десотел” группын сургагч багш нар 15 хоногийн хугацаанд зохион байгуулж, 30 гаруй алба хаагчийг хамруулжээ.

Онцгой байдлын ерөнхий газрын захиалгаар Монгол орны цаг уур, орчин нөхцөлд тохируулан үйлдвэрлэгдсэн эдгээр автомашины онцлог нь манай улсад 42 метрийн урттай гал унтраах автомеханик шатны автомашин анх удаа нийлүүлэгдэж, албан ёсоор үүрэг гүйцэтгэж эхэлж буй юм.