Түргэн тусламж, галын гарц хааж, замын голд автомат хаалт байршуулжээ

2021-02-10, 904

Улаанбаатар хотод нийтийн эзэмшлийн зам талбайд барилга байгууламж барих, хашаа хатгаж хууль бусаар эзэмших гэсэн оролдлогууд байнга гардаг. Хотын захиргаанаас өнгөрсөн хугацаанд энэ чиглэлд нэлээд хөтөлбөр хэрэгжүүлж, тодорхой хэсгийг цэгцэнд нь оруулсан. Гэвч нийтийн эзэмшлийн зам талбайд хууль бусаар халддаг байдал одоо оршин суугчдын нэрийг барих хэлбэрээр үргэжилж байна.

Тодруулбал, Чингэлтэй зургадугаар хороо, нийслэлийн 50 дугаар сургуулийн зүүн талд орших 62 дугаар байрны “Шилтгээн" СӨХ нийтийн эзэмшлийн зам талбайд халджээ. Тус СӨХ иргэд олон нийтийн зорчдог зам дээр автомат хаалт байршуулсан нь зэргэлдээх байрны оршин суугчдыг бухимдуулаад байна. Өөрөөр хэлбэл, 62 дугаар байрныхаа оршин суугчдын автомашиныг оруулах зориулалттай автомат хаалтыг зэргэлдээх байрны оршин суугчдын зорчдог замын голд дур мэдэн байрлуулсан нь маргаан үүсгэжээ. Зөвхөн оршин суугчдын машин бус цар тахлын ноцтой энэ цаг үед яаралтай дуудлага гарлаа гэхэд түргэн тусламжийн автомашин орох боломжгүй, галын автомашин аврах ажиллагаа явуулах замыг нь хааж байрлуулсан нь гол асуудал болж байна.

Энэ асуудлаар зэргэлдээх байрны оршин суугчид НОБГ-т хандахад Галын орц гарц бүхий холбогдох дүрэм журам зөрчсөн болохыг тогтоож, замын голд байрлуулсан хаалтаа цааш нь татахыг анхааруулжээ. Тухайлбал, Монгол Улсын Барилгын норм ба дүрмийн 21-1-2-т зааснаар Барилга байгууламжийн галын аюулгүй байдалд тусгасаны дагуу орох гарах гарцыг хоёр урсгалаар чөлөөтэй байх ёстой гэснийг зөрсөн байна. Энэ мэтээр зохих журмын дагуу баталсан бусад норматив баримт бичигт заагдсан галын аюулгүй байдал зөрчсөн Чингэлтэй дүүргийн зургадугаар хорооны Шилтгээн СӨХ-ны дарга н.Нарантуяа гэх эмэгтэй шаардлагыг биелүүлэхгүй байгаа гэнэ.

Уг автомат хаалтыг нэг урсгалтай замын яг голд нь байрлуулсан учраас хажуу байрны оршин суугчдын автомашин зорчих боломжгүй болж, зарим нь гараашиндаа машинаа оруулах эрхийг нь боогдуулж байгаад оршин суугчид гомдол гаргасан байна. Гэвч 62 дугаар байрны “Шилтгээн" СӨХ-ны дарга н.Нарантуяа гэх эмэгтэй байрныхаа оршин суугчдын эрхийг хамгаалах нь бидний үүрэг гэдэг байдлаар ханджээ.

Зэргэлдээх байрны оршин суугчид уг асуудлаар Чингэлтэй дүүргийн зургадугаар хорооны хэсгийн ахлагч хандсан боловч мөн л СӨХ-ны дотоод асуудал гэдэг хариулт өгчээ. Нэг байрны оршин суугчдын эрх ашиг, нөгөө байрны оршин суугчдын эрх ашгаар хягаарлагдаж, цаашлаад түргэн тусламж, галын дуудлагын яаралтай үед замын голд тавьсан хаалтаанаас болж тусламж авч чадахгүй бол Чингэлтэй дүүргийн зургадугаар хорооны Засаг дарга, хэсгийн ахлагч болон Шилтгээн СӨХ-ны дарга хариуцлага хүлээж чадахгүйгээс хойш холбогдох байгууллагын шаардлагыг биелүүлэх ёстой. Хэрэв шаардлагыг биелүүлэхгүй бол төрийн байгууллагын дүгнэлтийг үл тоож буй Чингэлтэй дүүргийн зургадугаар хорооны удирдлагуудад хариуцлага тооцох хэмжээний асуудал ч мөн яригдаж болох юм.

Мэдээж оршин суугчдынхаа эрх ашгийг хамгаалах зөв боловч бусдын эрхийг үл тоож, нийтийн эзэмшлийн талбай бүхий нэг урсгалтай замын голд хаалтаа зоочихоод эрх ашиг ярьж байгаа нь хэр зохимжтой вэ гэдэгт дор бүрнээ дүгнэлт хийх биз ээ.

Түргэн тусламж, галын гарц хааж, замын голд автомат хаалт байршуулжээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.