Цагдаагийн байгууллагаас энэ сарын 25-ны өдрөөс ирэх сарын 05-ны өдөр хүртэл "Тусгай дуут болон гэрлэн дохио" хэсэгчилсэн арга хэмжээ зохион байгуулан ажиллаж байна. Тус арга хэмжээний хүрээнд Сонгинохайрхан дүүрэг дэх замын цагдаагийн хэлтсээс дүүргийн нутаг дэвсгэрээр тусгай дуут дохио ашиглан замын хөдөлгөөнд оролцож байгаа автомашинууд болон тусгай дуут гэрлэн дохиот тээврийн хэрэгсэл ашиглан үйл ажиллагаа явуулдаг Төрийн болон төрийн бус байгууллага, аж ахуй нэгжийн тээврийн хэрэгсэлд  шалгалт хийж байна.

Шалгалтын явцад илэрсэн зөрчлийн талаар Замын цагдаагийн албаны зохицуулагч, цагдаагийн дэслэгч Г.Далайжаргалаас тодруулахад “ЦЕГ-ын Бүртгэл хяналтын төвөөс өгсөн тусгай дуут дохионы зөвшөөрөлгүй, болон зөвшөөрөлтэй автомашинуудын хүчинтэй хугацаа дууссан, зөвшөөрөл олгосоноос өөр өнгийн мигалк байршуулсан, гэрэл дохио хагарсан зэрэг зөрчлүүд илэрч байна. Илэрсэн зөрчилд зөрчлийн тухай хуулийн 14.7.16 дэх хэсэгт зааснаар нэг зуун нэгжээр арга хэмжээ тооцож харъяа байгууллагад хугацаатай албан мэдэгдэл хүргүүлж байна” гэлээ.