Нийслэлийн прокурорын газраас хянасан зарим шийдвэр явцын талаар мэдээлэл өглөө. Энэ үеэр “С.Зориг агсныг хөнөөсөн хэрэгт мөрдөн шалгах ажиллагаа үргэлжилж байгаа. 2022 оны тавдугаар сараас нэр бүхий гурван хүнд холбогдуулан шалгагдсан дээрх хэргийг цуцлах хүсэлтийг прокурорын байгууллагад гаргасан. Прокуророос дөрвөн удаа хянаж, мөрдөн шалгах ажиллагааг үргэлжлүүлэн шалгах ёстой гэх үндэслэлээр хүсэлтийг нь буцааж байсан. Гуравдугаар сарын 15-нд Б.Содномдаржаа, Т.Чимгээ нарын Эрүүгийн хэрэг үүсгэж яллагдагчаар татсан тогтоолыг хүчингүй болгох саналыг мөрдөх байгууллагаас тав дах удаагаа тавьсан. Прокурор мөрдөгчийн материалыг хянаж С.Зориг агсныг хөнөөсөн болох нь бүрэн тогтоогдохгүй байна. Эргэлзээ бүхий үндэслэл байна хэмээн үзэж дээрх тогтоолыг хүчингүй болгох шийдвэр гаргасан. Тэдний хэргийг дээд шатны прокурор хуулиараа хянах ёстой. Эхний шийдвэр гарсан боловч албан ёсны шийдвэр гараагүй байна” гэлээ.