Нийслэлийн Засаг даргын зөвлөлийн хурлаар нийслэл дэх автозамын хөдөлгөөний түгжрэлийг бууруулах асуудлаар хэлэлцлээ

Замын хөдөлгөөн төлөвлөлт, зохицуулалт, инженерчлэлийн газрын дарга С.Энхтөр “Нийслэлийн хэмжээнд 604 мянга 800 тээврийн хэрэгсэл замтээврийн хөдөлгөөнд орж байна. 10.01-ны байдлаар нэмж 72 мянга 451 тээврийн хэрэгсэл бүртгэгдсэн. Өдөрт 210-230 автомашин нэмэгдэж байна.

Нэг сая хүн амтай хотод 1000 нийтийн тээвэр үйлчилгээнд явах ёстой. Гэтэл 1.600.000 хүн амтай нийслэлд 903 автобус байгаа нь хангалтгүй. Нэмж 500-600 автобус шинээр оруулж ирсэнээр түгжрэлийг бууруулах боломжтой. Нийтийн тээврийн парк шинэчлэлийн ажлын хүрээнд ойрын хугацаанд 200-500 автобус хэрэглээнээс гаргах асуудлууд яригдаж байгаа.

Автозамын түгжрэлийг бууруулах талаар хэд хэдэн ажил судалгааны түвшинд явж байгаа. Тухайлбал, автозамын үндсэн сүлжээг хөгжүүлэх, шинэ их тойрууг зохион байгуулах, хотоор дамжин өнгөрөх автомашиныг хотын захаар өнгөрүүлэх, явган зорчигчид ээлтэй дэд бүтэцэд анхаарч дугуйн зам нэмэгдүүлэх шаардлагатай гэж үзэж байгаа.

Мөн зөрчилтэй жолооч, тээврийн хэрэгслийн хөдөлгөөнд холбогдох байгууллагууд хяналт тавих ёстой. Түүнчлэн ажлын цагийн уян зохицуулалт буюу өглөө 7-10 ийн хооронд иргэд өөрсдийн сонголтоор ажилдаа явж, орой 16-19 цагийн хооронд ажлаасаа тараад гэрлүүгээ явбал замын хөдөлгөөний ачаалалд цаг хугацааны сарнилт бий болсноор түгжрэл саарах боломжтой. Энэ санал судалгааны түвшинд явагдаж байгаа” хэмээн ярилаа.

Цагдаагийн хурандаа Ж.Амгалан “Дугаарын хязгаарлалтын дагуу өдөрт 100 мянган машин зогсоож байхад түгжрэл буурахгүй байна. Тиймээс иргэдийн саналаар тэгш, сондгойгоор нь долоо долоо хоногоор явуулах санал гаргасан.

Нийт 17 хувийн, хоёр орон нутгийн өмчийн компанийн 1200 автобус бүртгэлтэйгээс 903 нь үйлчилгээнд явж байна. Үүний тал нь улсын өмчит тээврийн хэрэгсэл. Парк шинэчлэлт хийх шаардлагатай. 

Нийслэлийн төсвөөс жилд 110 гаруй тэрбум төгрөгийг нийтийн тээвэрт зориулдаг. Үүний 79 тэрбум нь машин цагийн зардал бол үлдсэн нь нөхөн олговор юм” гэв.