Цаг агаар хүйтэрч, төв болон баруун аймгуудын нутгаар цас орж, Улаанбаатар хотоос Дархан-Уул аймгийн чиглэлд 52-ын даваа, Баруунхараагийн зам, Төв аймгийн Лүн сумаас Булган аймгийн Рашаант сум, Өвөрхангай аймгийн Арвайхээр сум хүртэлх зам, Улаанбаатар хотоос Орхон аймаг хүртэлх түр зам буюу Булган аймгийн Орхон, Дашинчилэн, Бүрэгхангай сумдын зам хүндэрч онцгой нөхцөл байдал үүсээд байгаа. Тийм учраас Улаанбаатар-Дархан чиглэлийн замыг Зам тээврйин хөгжлийн сайдын тушаалаар 10.00 цагаас оройн 20.00 цаг хүртэл түр хааж, автотээврийн хэрэгслийн хөдөлгөөнийг зогсоожээ.  

Дээрх чиглэлийн замаар дайран өнгөрөх тээврийн хэрэгслүүдийг ойр байрлах хот, суурин газар хоноглуулах бөгөөд зорчигчдын буудал, хоолны мөнгийг “Зорчин явагчийн гэнэтийн ослын даатгал”-ын нөхөн төлбөрөөр шийдэх зохицуулалт хийж байгаа аж.

2020.10.01-ний өдрийн 10.00 цагийн байдлаар:

• Улаанбаатар-Арвайхээр чиглэлийн авто замын 72-260скм хооронд зорчих хэсэгт үүссэн 5-50см зузаантай тогтсон цасыг “Эрдэнэсант АЗЗА” ТӨХК-аас авто замын бэлэн байдлыг хангуулахаар ажиллаж байна.

• Улаанбаатар-Дархан чиглэлийн 52-ын давааны замын нөхцөл байдал хүндэрч хөдөлгөөн зогссон, цасан шуургатай байна.

•Улаанбаатар-Дундговь чиглэлд Ногоон довийн даваа цасан шуургатай үзэгдэх орчин хязгаарлагдмал, хөдөлгөөн удаашралтай байна.

Дундговь, Төв, Дархан-Уул, Хэнтий аймгийн өмнөд хэсэг, Дорноговь аймгийн зүүн хэсгээр цас орж, цасан шуурга шуурч, авто замд халтиргаа гулгаа үүсэж болзошгүй байгаа тул иргэд, зорчигчид техникийн бүрэн бүтэн байдлыг хангасан, албан ёсны бүртгэлтэй аж ахуй нэгжүүдийн тээврийн хэрэгслээр тав тухтай зорчиж, GPS-ийн 24 цагийн хяналтан дор аюулгүй, баталгаатай тээвэрлэлтийг сонгон үйлчлүүлэхийг Авто тээврийн үндэсний төвөөс анхаарууллаа.