Гадаад харилцааны дэд сайдаар ажиллаж байсан Г.Тэнгэрийг Тавантолгойн цахилгаан станцын захирлаар томилжээ.

Тавантолгой цахилгаан станцыг барьж байгуулах нь өмнийн говийн уул уурхайн эрчим хүчний хэрэглээг найдвартай эрчим хүчний эх үүсгүүрээс хангах, тус бүс нутгийн эрчим хүчний системийн горимыг тогтворжуулж, найдвартай ажиллагааг сайжруулах, нүүрсний тээвэрлэлтийн зардлыг хэмнэх зэрэг олон талын ач холбогдолтой. Хамгийн сүүлд 2020 оны дөрөвдүгээр сарын 8-нд Тавантолгой цахилгаан станцыг төрийн өмчийн хөрөнгөөр барих шийдвэр гаргасан юм.

Г.Тэнгэр нь 1974 онд Улаанбаатар хотод төрсөн. 2006 онд Москвагийн Олон улсын харилцааны дээд сургууль, 2016 онд Францын Үндэсний удирдлагын их сургууль төгсч, Нидерландын Клингендалийн их сургуульд олон улсын харилцааны чиглэлээр мэргэжил дээшлүүлсэн. Франц, орос, англи хэлний мэдлэгтэй, “Тэргүүн итгэмжит” дипломат цолтой, гадаад харилцааны салбарт 11 жил ажилласан юм.