Сэлэнгэ аймгийн Ерөө сумын Бугант багийн Байшинт уулын Хотгойн рашаан гэдэг газар 17 хүн самар түүж байснаас зургаа нь энэ сарын 8-нд явганаар хүнсэнд яваад буцах замд хоёр нь ядарч эцээд замд үлджээ. Үлдсэн нэг нь нас барж, нөгөө нь сураггүй болжээ. Тус аймгийн Онцгой байдлын газар, Цагдаагийн газрын алба хаагчид, Хан Хэнтий тусгай хамгаалалтын газрын ажилтнууд, орон нутгийн иргэд эрэн хайх ажиллагааг зохион байгуулахаар очих явцад энэ сарын 16-ны өдөр 16:00 цагийн орчим Дархан-Уул аймгийн харьяат иргэн Ч ,50 настай, эрэгтэй нь отгоосоо дөрвөн км-ын зайтай байрладаг өөр отогт эсэн мэнд очсон тухай мэдээллийг Цагдаагийн байгууллагаас мэдэгдсэн байна.

       Эрлийн бүлэг Хотгойн рашаан гэдэг газраас 20 орчим км-ын зайтай байдаг отогт энэ сарын 17-ний 17:08 цагт очиход иргэн Ч-г эрэн хайх ажиллагаанд оролцож байсан П,50 настай, эрэгтэй, П,56 настай, эрэгтэй нар өдрөөс хойш отог дээрээ ирээгүй, сураггүй болжээ. Тус хоёр хүнийг эрэн хайх ажиллагааг зохион байгуулахаар Хотгойн рашаан гэдэг газрын чиглэлд хөдөлгөөн үйлдэж, энэ сарын 18-ний 21:00 цагт отогт очсон байна. Эрэн хайх ажиллагааг зохион байгуулж өчигдөр Байшинт-Уул гэдэг газраас эсэн мэнд олжээ. Эрлийн бүлэг өчигдөр 00:00 цагт ангийн байрлалд ирсэн байна.