-Хүчирхийллийн 101 дуудлага бүртгэгдэж, 100 гаруй хүн эрүүлжүүлэгдсэн-

Улсын хэмжээнд энэ сарын 23-наас ирэх нэгдүгээр сарын 6 хүртэл хөл хорио тогтоогоод байгаа. Өндөржүүлсэн бэлэн байдал зарлаж, хөл хорио тогтоогоод байгаа энэ үед цагдаагийн байгууллагад ямар төрлийн дуудлага мэдээлэл ихэвчлэн бүртгэгдэж байгаа болон бусад асуудлаар ЦЕГ-ын Хэвлэл мэдээллийн төвийн дарга Б.Баатархүүгээс тодрууллаа.

-Хөл хорио тогтоосноос хойш цагдаагийн байгууллагад хэчнээн дуудлага мэдээлэл бүртгэгдээд байна вэ?

-Өнгөрсөн хоногийн хугацаанд цагдаагийн байгууллагад 951 дуудлага, мэдээлэл ирсэн байна. Бусад өдөрт үүнээс их дуудлага мэдээлэл бүртгэгддэг. Нийт дуудлагын 450 буюу 50 орчим хувь нь зөрчлийн шинжтэй байна. Харин гэр бүлийн хүчирхийллийн шинжтэй 101 дуудлага бүртгэгдэж, 100 гаруй хүн эрүүлжүүлэгдсэн. 27 хүн согтуугаар тээврийн хэрэгсэл жолоодсон байна.

-Өмнө тогтоосон хөл хорионоос ялгаатай нь энэ удаа архи согтууруулах ундаа худалдан борлуулахыг хориглоогүй. Энэ нь гэр бүлийн хүчирхийлэл зэрэг бусад зөрчил нэмэгдэх нөхцөлийг бүрдүүлж байна уу?

-Яг ч тэгж холбон тайлбарлаж болохгүй. Олон талын хүчин зүйл байгаа. Тэгэхээр зохистой хэрэглээ гэж зүйл бий. Архи, согтууруулах ундаа худалдаалахыг хориглосон чинь сөрөг үр дагавар гарсан. Тухайлбал, гар дээрээс архи, согтууруулах ундаа худалдаалах, шаглах зөрчил маш ихээр илэрч байсан. Энэ удаагийн хөл хорио тогтоосон хугацаанд архи шаглах зөрчил харьцангуй гайгүй байна. Бүх нийтийн бэлэн байдлын зэрэгт анх шилжсэн үед архи шаглах, цахим сүлжээгээр мөрийтэй тоглоом зохион байгуулах зөрчил нэлээд гарсан. Харин энэ удаа 17 градусаас доош согтууруулах ундаа худалдаалахыг зөвшөөрсөнтэй холбогдуулаад нөхцөл байдал, ачаалал харьцангуй гайгүй байгаа. Хөл хорио тогтоосноос хойш 4000 гаруй цагдаагийн алба хаагч дотоодын цэрэг хамтран гудамж талбай, товчоодод үүрэг гүйцэтгэж байна. Мөн тусгаарлах байруудад хамгаалалтын үүрэг гүйцэтгэж, коронавирусийн халдвар авсан нь тогтоогдож, батлагдсан тохиолдлуудын хавьтагч нарыг олж илрүүлэх ажлыг хийж, нэлээд ачаалалтай ажиллаж байна. Хөл хорио тогтоосон өдөр буюу энэ сарын 23-нд ямар нэгэн зорилгогүй, үйл ажиллагааг нь хориглоогүй 15 чиглэлийн үйлчилгээнд хамааралгүй 5000 орчим иргэнийг гэрт нь буцааж, зөвлөмж, мэдээлэл өгч ажилласан. Амны хаалт зүүгээгүй 3000 гаруй иргэнд санамж, сэрэмжлүүлэг өгсөн. Мөн үйл ажиллагааг нь хориглоогүй 15 чиглэлийн үйл ажиллагаа эрхэлдэг хүмүүст QR  код олгож, тээврийн хэрэгслийн хөдөлгөөнд оролцуулж байгаа. Хүндэтгэх шалтгаантай буюу жирэмсэн эмэгтэйчүүд, өндөр настан, түргэн тусламж шаардлагатай иргэдийг цагдаагийн алба хаагчид холбогдох бичиг баримтыг нь шалгаад постоор нэвтрүүлж байгаа. Мөн гэнэтийн байдлаар бие нь өвдсөн иргэн энэ сарын 23-нд гэхэд л 991 байсныг шалган нэвтрүүлэх цэгээр нэвтрүүлсэн. Харин худал хэлж постоор нэвтрэх гэсэн иргэд маш их байгаа нь хүндрэлтэй байна. Тэгэхээр цагдаа, иргэн хоёрын хооронд зөрчилдөөн гарч байгаа юм. Тиймээс бидний хийж байгаа ажлыг та бүхэн ойлгох хэрэгтэй. Бид иргэдийн хөдөлгөөнийг хориглож, зорчих эрхийг нь зөрчиж байгаа юм биш шүү. Коронавируст халдвар ЭМЯ-ны мэдээлснээр нийслэлийн аль ч дүүрэгт гарч болзошгүй, хүндхэн нөхцөл байдалтай байна. Тийм учраас иргэдийн хөл хориог тогтоож, хавьтагч нарыг олж илрүүлэх ажлыг шуурхай явуулж, шинжилгээ авах ёстой.

-Өнгөрсөн шөнө цагдаагийн байгууллагад 951 дуудлага бүртгэгдсэнээс 450 нь зөрчлийн шинжтэй байсан гэлээ. Зөрчлийн гэдэгт ихэвчлэн ямар төрлийн гэмт хэрэг багтдаг вэ?

-Согтууруулах ундааны зүйл хэрэглэсэн, иргэдийн амгалан тайван байдал алдагдуулсан гэх мэт дуудлага мэдээлэл багтана. Өчигдрийн тухайд Чингэлтэй дүүргийн нутаг дэвсгэрт ПС тоглоомын газар ажиллуулж, 10 гаруй хүүхэд тоглож байсан зөрчил илэрсэн. Эрүүл мэндээс илүү чухал зүйл гэж хаана ч байхгүй. Улс даяар цар тахлын улмаас өндөржүүлсэн бэлэн байдлын зэрэгт шилжчихсэн байхад ПС тоглоомын газар ажиллуулаад, хүүхдүүдийг цуглуулаад байж байна гэдэг маш харамсалтай зүйл. Энэ асуудалд холбогдох хуулийн дагуу хариуцлага тооцно. Иргэдэд дахин сануулахад эрүүл мэндийн байгууллагаас өгч байгаа заавар, зөвлөмжийг дагаж, онцын шаардлагагүй бол гэрээсээ битгий гараарай. Амны хаалтаа тогтмол зүүж, гараа сайн ариутгаж, ажлын өрөө болон гэртээ агаарын сэлгэлт хийгээрэй. Энэ зөвлөмжүүд нэг их хүндрэлтэй зүйл биш шүү дээ. Хувь хүний хариуцлагын асуудал. Эдгээр зөвлөмжийг сайтар дагаж мөрдөх юм бол бид шинэ оноо өвчин зовлонгүй угтах боломжтой. Ес эхэлчихсэн гадаа хүйтэн байгаа энэ үед цагдаа алба хаагчид үүргээ зохих ёсных нь дагуу  гүйцэтгэж ажиллаж байна.

-Хөл хорио тогтоохоос өмнө ихэвчлэн ямар төрлийн дуудлага бүртгэгддэг байсан бэ. Хөл хорио тогтоосноор ямар өөрчлөлт гарсан бэ?

 -Хөл хорио тогтоосноос хойш хулгайн гэмт хэрэг багасаад байгаа. Өнгөрсөн хоногт хулгайн дөрвөн гэмт хэрэг бүртгэгдсэн. Энэ нь хүмүүс гэртээ байгаатай холбоотой юм. Ер нь бол манай улсад бүртгэгдэж байгаа гэмт хэргийн 30 орчим хувийг хулгайлах гэмт хэрэг эзэлдэг. Мөн дээрээс нь зам тээврийн осол, иргэдийн эрх чөлөө, эрүүл мэндийн эсрэг гэмт хэргүүд эзэлж байна.  Энэ төрлийн гэмт хэргүүд бууралттай байгаа. Харин эрс ихэссэн гэмт хэргийн дуудлага мэдээлэл харьцангуй гайгүй байна.