ЗУРВАС:ХҮСЭЛ

Д. Бямбасүрэн:
Соёл урлаг- Зурвас

2024-09-01, 660

Өнө хол одсон бодлоо хураанам. Үүрийн хөх гэгээг алган дээрээ буулганам. Өглөө эрт буусан шүүдрийн дуслыг түүгээд алс руу алхнам. Нар дээш хөөрөхийг дундаас нь зогсоож, мандсан газарт нь буцаах сан. Үүлсийг ганцхан үлээгээд тув тунгалаг тэнгэрийн гүн рүү гараа дүрэх сэн. Тэгээд нүүрээ угааж, тэндээс газрыг харах сан. Талыг эвхэж, дов толгод цөмийг нь тэгшлэх сэн. Шувуудыг газарт буулгаж, хүмүүсийг тэнгэрээр нисгэх сэн. Газрыг тэврэх сэн. Зүүдээ бүтнээр нь захидал болгоод хадгалах сан.

Цас болоод зун будрах сан. Бороо болж өвлөөр шиврэх сэн. Салхийг хайчлах сан. Хайчилсан салхиа хэдэн хэсэг болгоод хадны завсарт нуух сан. Талд зурайх зам бүхнийг баллуурдаж, хэнийг ч явах зүг чиггүй болгох сон. Ертөнцөд ургах өвс бүхнийг нэг болгоод сүлжих сэн.

Далай тэнгисийн давалгааг тэнийлгэх сэн. Зэрэглээг арчиж арилгах сан. Өчигдрийг өнөөдөртэй уулзуулж, хамгийн чухал цаг хугацаа аль нь гэдгийг асуух сан. Өндөр уулын орой дээрээс өөр нэг ертөнц рүү үсрэх сэн. Манантай ууланд өдөржин суух сан. Навчаар үсээ самнаж, голын толионд өтөл дүрээ харах сан.

Хойд зүгийн салхийг сөрж алхах сан. Хацраа жаварт хайруулаад үл тоон инээж зогсох сон. Нартай өдөр сүүдэр дор нуугдах сан. Бороотой өдөр нар хайж алхах сан. Задгай галын дэргэд санаа алдан суух сан. Замын хүнтэй өдөржин хууч хөөрөх сөн. Чимээ бүхний дууг хурааж, чимээгүй бүхнийг дуутай болгох сон. Сэтгэлээ гаргаж ирээд талаар нэг тараах сан. Уулсын оронд зүрхээ байрлуулаад, юу үгүй хоосрох сон.

Данзангийн Нямсүрэнгийн “Амитаба”-г уншиж, нисээд явсан шувуу адил анир алдарч, өөрийнхөө үсний ойчих чимээг сонсох сон. Бүхнийг л “эвдмээр”байна. Байрыг нь сольж, байхгүй бүхнийг гаргаж ирмээр байна. Зүв зүгээр оршмооргүй байна. Зүггүйтэж, бүхнийг өөрчилчихөөд, яваад өгмөөр байна.

ЗУРВАС:ХҮСЭЛ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид