Монгол Улсын хөдөл­мөрийн баатар, алдарт хоньчин Ц.Намхайнямбуу гуай нэгэнтээ “Үхрийн баас удах тусмаа хөнгөрдөг” хэмээн хэлсэн байдаг. Энэ баасны тухай яриа биш юм. Ухаж ойлговол элдвийн муу зүйл болон сэтгэлийн хүнд дарамт удах тусмаа мартагдаж, сэтгэл хөнгөрдөг. Энэ амьдралд хүнд хэцүү юу ч тохиолдож болно. Хад мөргөчихсөн юм шиг, гарах гарцгүй болчихсон мэт санагдах үе зөндөө бий. Магадгүй таны амьдралд даван туулж болшгүй мэт хэцүү зүйл тулгарч, үүнээс цааш амьдрал байхгүй мэт санагдаж байж мэдэх юм. Гэхдээ тэр болгон цаг зуурын л асуудал юм гэдгийг дээрх хэдхэн үгээр хэлчихсэн мэт.

ТЭСЭЖ ӨНГӨРҮҮЛЭХ ХУГАЦАА МАШ БОГИНОХОН БАЙДАГ ШҮҮ..

Түрхэн зуурын цохилтыг тэсэж гарах, маш бага цаг хугацааг даван туулах юм бол бүх зүйлс сайхан болно. Ганц олдох энэ амьдралд тэсч өнгөрүүлэх хугацаа маш богинохон байдаг юм. Цагийн эрхээр хүнд хэцүү болгон ард үлдэж, сэтгэл чинь аяндаа хөнгөрөөд л ирнэ. Гэрэл гэгээ, инээд хөөр бялхсан сайхан амьдрал цааш үргэлжилсээр байх болно.

Э.Баатар