Үйлчилгээний газраар явж байхад хүмүүсийн зан харилцаанаас нэгэн зүйл тод ажиглагдах болжээ. Төрийн байгууллагын үйлчилгээний газарт гэхэд хөөцөлдөж байгаа зүйлийнхээ талаар мэдэхгүй зүйлээ мэргэжилтнүүдээс асуухад хамарт нь баас түрхчихсэн юм шиг ярвайчихаад дуугарч ядаад байдаг. Асуусан асуултад уцаарлангуй, загнасан байдалтай хариулна. Зарим нь бүр дооглонгуй ярьж, ихэмсэг байх гэж хэт их хичээдэг.

Тэгвэл ажлаа мэддэггүй, арын хаалгаар ажилд орсон, мэргэжлээрээ цаашид ажиллах хүсэл тэмүүлэлгүй, ажилдаа дургүй хүмүүс жирийн иргэдэд их зан гаргадаг гэдгийг судлаачид дурджээ. Хэн нэгний татаасаар ажилтай болсноо их юманд бодож, эргээд хөрсөн дээрээ буухгүй юм шиг зан авир гаргадаг нь амар хялбар замаар албан тушаалд томилогдсонтой нь холбоотой байдаг аж.

         Харин юм үзэж нүд тайлсан, олон хүнтэй уулзаж, ажил төрөл хөөцөлддөг, ажил мэргэжилдээ дуртай хүмүүс бусдад үйлчлэхдээ энгийн сайхан ханддаг юм байна. Анзаарсан бол салбартаа амжилт гаргаж байгаа, мэргэжлийнхээ түвшинд бусдад танигдсан хүнээс сонирхсон зүйлээ асууж тодруулахад дор нь учрыг тайлбарлаад, тухайн хүнд ойлгуулаад, зөв ойлголт өгөөд явуулдаг шүү дээ. Гэхдээ ийм хүн цөөхөн байна. Энэ нь ялангуяа манай төрийн алба мэргэшсэн, мэргэжилдээ дуртай хүмүүсээр бус ар өврийн хаалганы их зантуудаар дүүрсний тод илрэл билээ.

Э.Баатар