-“М.МЯГМАРЖАРГАЛЫН НЭР ГАРАХГҮЙ. МОНГОЛ УЛСЫН НЭР ГАРНА ШҮҮ" ГЭЖ ӨӨРТӨӨ ҮРГЭЛЖ ХЭЛДЭГ-

             Монгол Улсын боксын дөрвөн удаагийн аварга, Дэлхийн аварга шалгаруулах тэмцээний хүрэл медальт “Ширэн бээлий” клубын боксчин, ОУХМ М.Мягмаржаргал “Токио-2021” олимпын наадамд оролцох эрх авсан сайхан мэдээг монголчууддаа дуулгаад удаагүй байна. Энэ үйл явдал нь монголын эмэгтэй боксчидын түүхэнд анхдагч болон бичигдэж байгаа билээ. Эрэмгий, дайчин, зоригтой, бяртай боксчин М.Мягмаржаргалыг “Түүчээ” буландаа урьж ярилцлаа. Тэрбээр Монгол Улсын Төрийн дууллаа дэлхий дахинд эгшиглүүлж, тэмцээндээ амжилттай оролцохоор бэлтгэлдээ шамдан оржээ.

-“Токио-2020” олимпийн наадамд оролцох эрхээ авсан танд баяр хүргэе. Та гэлтгүй монголчууд ихэд баярлаж хүлээж авлаа шүү дээ. Сэтгэгдлээсээ хуваалцахгүй юу?

       -Баярлалаа. Би энэ сарын 18-ны өдөр олимпод оролцох эрхтэй болсноо мэдээд маш их баярлаж, үсэрч дэвхэрээд, сэтгэл хөөрсөн, бас айсан сайхан өдөр байлаа.  Хамгийн түрүүнд ээж, нөхөр хоёртоо хэлсэн чинь нөхөр минь уйлсан. Би нөхрийнхөө нулимсыг анх удаа үзлээ, гайхлаа. Урмын үгээр маш их тэтгэгдэж байгаа. Олимпын эрх авах нь сайхан байгаа ч маш их хариуцлага ногдож байна. Зөвхөн миний нэр гарахгүй Монгол Улсын нэр гарна шүү дээ гэхээр айдас төрж байна. Гэхдээ чадах бүх зүйлээ хийнэ гэж бодож байгаа.  

-Олимп хэзээ эхлэх вэ. Бэлтгэлдээ орсон уу?

-Олимп долдугаар сарын 23-нд эхэлнэ. Харин боксын төрөл нь 25-нд эхлэх юм байна лээ. “Ширэн бээлий” клубтээ суурь бэлтгэлээ орой бүр 18:00 цагаас Төрөө багштайгаа хамт хийж байгаа. Дэлхийн аваргуудтай тулалдаж үзсэн болохоор тактик дээрээ ажиллана. Багш нарын минь зөвлөгөө чухал учраас бэлтгэлээ сайн хийх хэрэгтэй.

-Та багаасаа л спортод дуртай хүүхэд байв уу. Бөхийн удамтай юу?

-Багаасаа л спортод дуртай, хөдөлгөөнтэй хүүхэд байлаа. Миний аав Өвөрхангай аймгийн Хархорин, ээж минь Бат-Өлзий сумынх. Аав, ээжийн минь дүү нар барилддаг юм аа. Бөхийн удамтай гэж хэлэхэд болохоор байх.  Аав минь намайг “Бөх болгоно” гэдэг байлаа. Сургуулийн сурагч байхдаа жүдо бөхөөр хичээллэж, аймгийн аварага шалгаруулах тэмцээнд орж ялагдснаас хойш жудог орхисон. Сагсан бөмбөгийн дугуйланд явдаг хүүхэд байв. Тэгээд 2010 онд Аварга биеийн тамирын дээд сургуульд орсон. Оюутан ангийн охин боксоор хичээллэдэг байсан болохоор намайг “Боксоор хичээллээд үз” гэж ятгасан.

Анх зүгээр л сонирхож очиж байсан ч өнөөдөр тамирчин болсон байна. 2012 оноос боксын спортоор хичээллэж эхэлсэн. Тухайн үед энэ спортоор “Улсын аварга болъё” гэж бодож байлаа.

Тэгээд улсын аварга шалгаруулах тэмцээнд орж, хамт бэлтгэл хийж байгаа н.Эрдэнэтуяад хожигддог юм даа. Түүнээс хойш улс, ази, дэлхийн аварга болъё гэж зориг шулуудан, өнөөдөртэй золгоод байна. Тухайн үед мундаг тамирчдаас үлгэр жишээ авч, “Тэдний хэмжээнд очих юм сан” гэх хүслээр жигүүрлэж байлаа шүү дээ. 2016 онд БНХАУ-ын Хөх хотод бэлтгэл хийж байхдаа “Рио-2016” олимпын медальтай өөрөөсөө дүү тамирчинг хараад бахархаж, түүн шиг болохыг мөрөөдөж, тоглолтуудыг нь үздэг болсон. 

-Танд анх боксоор хичээллэхэд ямар санагдсан бэ?

-Маш хэцүү санагдсан. Манай найз бэлтгэлгүй үедээ маш эмэгтэйлэг байдаг юм. Найзынхаа бэлтгэл хийж байгааг хараад үнэхээр гайхсан. Түүний нүд яахаас ч буцахгүй болчихсон байсан шүү. Найзыгаа хараад айсандаа болоод ч тэр үү анхан шатны дасгалууд нь маш хүнд, хэцүү санагдаж, “Би ч чадахгүй юм байна даа” гэж бодож байлаа.

-Боксоор хичээллэж байгаа хүний нүд хүртэл өөрчлөгддөг юм байна шүү дээ. Түүнтэй адил сэтгэл санаа ч өөрчлөгддөг байх даа?

-Боксын спортоор хичээллэж байгаа хүн эрэмгий, дайчин, зоригтой байхаас өөр аргагүй. Хэл яриа, нүдний харц, сэтгэл зүй гээд бүгд өөрчлөгддөг юм билээ.  Боксоор хичээллээд удаагүй байтал ээж надад “Чиний үйлдэл их ширүүн болоод байна” гэж хэлж байсан. Тэгэхээр байгаа байдал хүртэл өөрчлөгддөг юм шиг байна лээ.

-Тулааны талбар дээр гарч өрсөлдөхөд танд ямар мэдрэмж төрдөг вэ. Та ренгинд гарахаас өмнө өөртэйгөө ярилцдаг уу?

-Олон улсын тэмцээнд оролцохдоо “М.Мягмаржаргалын нэр гарахгүй. Монгол Улсын нэр гарна шүү” гэж өөртөө хэлдэг. Харин бэлтгэлийн үед “Чи өнөөдөр л зов. Харин маргааш жарга” гэж хэлдэг. Бэлтгэлээ сайн хийхээр тэмцээн дээр ядардаггүй, өмнө нь хожигдож байсан тамирчнаа хожих юм бол урам авч, бүр ч илүү сэргэдэг. Хэн нэгнийг ялахаар, бүхнээ зориулж хийсэн бэлтгэл санаанд ордог. Бокс гурван минутаар гурван үе тоглодог. Хөндлөнгийн хүмүүс харахад амархан боловч тамирчдад маш хэцүү. Талбайд гарч тулалдахын тулд олон сар, жилийн хүч хөдөлмөр зарцуулдаг шүү дээ.

-Боксчин М.Мягмаржаргал ямар зан араншинтай эмэгтэй вэ?

-Би хүмүүсээс боксчин гэдгээ нуудаг. Хүмүүс надаас “Бокс тоглодог уу” гэж асуудаггүй. Харин “барилддаг уу” гэж асуудаг. Би ширүүн, хатуу  харагддаг боловч их зөөлөн сэтгэлтэй. Амархан уйлж, инээж, гомдож, баярладаг. Боксын талбар дээр гараад “Би үхэв л гэж дээ” хэмээн бодож өөрийгөө зоригжуулдаг. Өрсөлдөгч намайг нэг цохиж байхад би заавал хоёр цохих ёстой гэж боддог.

-Таныг зоригжуулж, урам өгдөг  хүн хэн бэ?

-Миний эрэгтэй дүү намайг зоригжуулдаг, хурцалдаг, ойлгодог,зөвлөдөг, алдаа дутагдал бүхнийг ил тод хэлдэг.Боксыг надаас илүү мэддэг болсон. Тийм болохоор дүүгээсээ айдаг шүү.

-Сайн тамирчны ард мундаг багш, дасгалжуулагч байдаг шүү дээ. Багш нарынхаа талаар ярьж өгвөл?

-2012 оноос хойш өнөөдрийг хүртэл “Ширэн бээлий” клубын Төрбат багшийн удирдлагаар хичээллэж байна. Багш минь миний аав, ах, найз шиг байж урам өгч, зоригжуулдаг, загнадаг, аргаддаг, дэмждэг. Би заримдаа багшдаа туньж уйлдаг. Мөн шигшээ багийн Буянжаргал багшаараа бахархдаг. Намайг олимпын эрх авахад багш нар минь их нөлөөлсөн дөө. Багш нартаа “Талархаж явдаг шүү” гэдгээ хэлмээр байна.

-Та өөрийгөө ямар тамирчин гэж боддог вэ?

-Би өөрийгөө дайчин, бяртай гэж боддог. Заримдаа өөрийнхөө бяртай гэдгийг бодитоор мэдэрдэг. Яагаад гэвэл, гаднын тамирчидтай тулалдаж байхад тэд нүдээ аних, цочих нь анзаарагддаг. Тийм болохоор би хүчтэй цохиж байна гэсэн үг. Мэдээж, надад маш их сул тал бий.

-Бокс гэж таны хувьд юу вэ?

- Спорт, тэр дундаа боксын спорт маш хэцүү. Хамгийн сайхан зүйл нь зөв хүн болж төлөвшдөгт л байгаа юм. Спорт бол хүндлэл. Найз нөхөд, хамаатан садан, ах дүү, тамирчин, дарга хэн бүхэнтэй ижил харьцаж чаддаг. Өөрөө  ч ийм болсон гэдгээ мэдэрдэг. Боксын спорт миний байж болох хамгийн сайхан орон зай, талбар гэж боддог. Би боксын талбайд гараад өөрийнхөөрөө байж чаддаг. Үүний үр дүнд сайхан хамт олонтой болж олон зүйлийг мэдэрч байна. Бокс бол надад өгсөн бурханы бэлэг. Би боксын спортод бүхнээ зориулж, түүгээрээ өдөр бүр хичээллэдэг. Боксоо зүүдэлнэ, энгийн үед цохилт дадлаараа давтдаг. Тэмцээн үзэхээрээ өөрийн эрхгүй цээж хөдөлдөг. Энэ бүхэн боксын спортод уусч, шингэсний илрэл гэж боддог юм аа.

-Боксын спортоор хичээлэхээр төлөвлөж байгаа залууст хандаж юу хэлэх вэ?

-Яг өнөөдрөөс эхлээд үз. Боксын заал руу нэг алхам ойртоод үз. Хэрвээ эхэлсэн бол тууштай, үнэнч байгаарай. Чиний хөлсийг бурхан заавал шагнана шүү гэж хэлмээр байна.