Хөл бөмбөгийн амьд домгуудын нэг, Аргентиний шигшээ багийн тоглогч асан Диего Марадона хорвоогийн мөнх бусыг үзүүлжээ. Тэрбээр сар гаруйн өмнө цус харвасан байдалтай эмнэлэгт хүргэгдэж байсныг бид мэдээлж байсан билээ. Домогт тамирчны биеийн байдал дээрдэж байсан ч өнөөдөр зүрх нь зогссон байна.

1986 онд Аргентиний шигшээ багаа дэлхийн аваргад “хүргэсэн” Марадона олон жилийн өмнө зойдог тайлсан ч түүнийг үнэнч хөгжөөн дэмжигчид нь үргэлж өнөөгийн супер одуудаас илүүд тавьж, шагшин магтсаар ирсэн юм. Аргентиний хөл бөмбөг сонирхогчид төдийгүй дэлхий даяарх хөгжөөн дэмжигчид, шүтэн бишрэгчдийнх нь хувьд өнөөдөр хамгийн бараан, гунигт өдөр нь болж хувирлаа. Сүүлийн хэдэн өдөр түүний мянга мянган хөгжөөн дэмжигч “Мэс засал нь амжилттай болоосой” хэмээн эмнэлгийнх нь гадаа цуглаад байсан билээ.