“Метро Голдвин Майер” компани, “MGM/UA” телевиз, Израилийн “Тадмор” энтертайнмэнт студи нар хамтран олимпын мөнгөн медальт, дэлхийн аварга Саид Моллайн амьдралаас сэдэвлэсэн олон ангит кино хийж байгаа юм байна. Тус кинонд Сайд Моллай болон Олон улсын жүдо бөхийн холбооны ерөнхийлөгч Мариус Визер, Израилийн жүдоч Саги Муки нарын нөхөрлөл, жүдо бөхийн үнэ цэнийн тухай түүхийг өгүүлэх гэнэ. 2019 оны наймдугаар сард Токио хотод болсон ДАШТ-д Сайд Моллай хэсгээ тэргүүлж,  цааш амжилттай барилдвал Израилийн бөх Саги Мукитай оноолт таарах байлаа. Харин Иран Улс Израильтай дайсагнадаг учир тамирчдаа тус улсын бөхчүүдтэй барилдахыг хориглодог байжээ. Үүнтэй холбоотойгоор Ираны эрх баригчид Моллайг дайсан орны бөхтэй барилдуулахгүйн тулд өмнөх барилдаандаа зориуд ялагдахыг шаардсан гэдэг. Тиймээс дээрх кино нь тухайн үе бодит үнэн, Саид Моллай болон Саги Мукигийн нөхөрлөлийг харуулах учир жүдо сонирхогчид дунд хүлээлт үүсгээд байгаа аж.

Кино төслийг санаачлагч “Метро Голдвин Майер” компанийн ерөнхийлөгч Стив Старк тус олон ангит киноны талаар "Саид Моллай, Саги Муки хоёрын жүдогийн талбай дээрх гайхалтай өрсөлдөөн болон хэн ч атаархам ер бусын нөхөрлөлийн түүх нь дэлхий дээрх олон сая спорт сонирхогчид болон үзэгчдийн зүрхэнд хүрч чадна” гэжээ.