Увс аймгийн Ховд сумын харьяат, даян аварга Н.Батсуурийн цолонд хүндэтгэл үзүүлэх барилдаан өнөөдөр Улаангом сумд болох гэж байна. Даян аварга цолны хүндэтгэлийн барилдаанд улс, аймгийн цолтой 128 бөх барилдах аж. Бид энэ талаар Увс аймгийн Засаг даргын орлогч, хүндэтгэлийн барилдааныг зохион байгуулах ажлын хэсгийн дарга Ж.Александртай холбогдож, тодрууллаа.

               Тэрбээр “Даян аварга Н.Батсуурийн цолонд хүндэтгэл үзүүлэх улс, аймгийн цолтой 128 бөхийн барилдаан болох гэж байна. Хүндэтгэлийн барилдаан Увс аймгийн цагаар 12:00 цаг буюу Улаанбаатарын цагаар 13:00 цагт эхэлнэ. Хүндэтгэлийн барилдаан эхлэх цаг болоогүй байгаа ч, үзэгч олон цуглаад эхэлсэн байна.

Н.Батсуурийн даян аварга цолны хүндэтгэлийн барилдаанд Улаанбаатар хотоос улсын заан Д.Бумбаяр, улсын харцага Т.Баасанхүү, Ц.Мөнхбаяр, улсын начин Ж.Алтансүх, Б.Насандэлгэр, энэ жилийн сар шинийн үндэсний бөхийн барилдааны түрүү бөх, аймгийн заан Э.Мөнхжаргал тэргүүтэй 40 гаруй бөх ирсэн. Мөн Тува Улсын Биеийн тамир, спортын сайд Сүбээдэй, УИХ-ын гишүүн асан, “Увс нуур” бөхийн дэвжээний тэргүүн Н.Цэрэнбат, ШШГЕГ-ын тэргүүн дэд дарга, генерал Д.Дамдинцэрэн зэрэг зочин, төлөөлөгч ирээд байна.

               Хүндэтгэлийн барилдааны түрүү бөхөд таван сая төгрөг, үзүүр бөхөд гурван сая төгрөг, их шөвөгт шалгарсан бөхөд нэг сая төгрөгийн бай, шагнал олгоно” гэв.

Ташрамд дурдахад, даян аварга Н.Батсуурийн цолонд хүндэтгэл үзүүлэх барилдааныг www.uvschuud.mn сайт болон тус сайтын албан ёсны “Фэйсбүүк” хуудсаар шууд дамжуулах юм байна.