ЖҮДО БӨХИЙН ХОЛБОО: САИД МОЛЛАЙГ АЗЕРБАЙЖАН УЛСЫН ИРГЭН БОЛОХ ЭСЭХИЙГ ОДООГИЙН БАЙДЛААР ХЭЛЭХ БОЛОМЖГҮЙ

Иргэншлээ сольж, энэ дэлхийн олон улс орноос зөвхөн Монголыг зорьж ирсэн Сайд Моллайг “Дахин иргэншлээ солих болсон тухай олон улсын хэвлэлүүд мэдээлж эхэллээ” гэх мэдээ амралтын өдрүүдэд цацагдлаа. Бүр тодруулбал, “Монгол Улсын иргэн,  манай улсын нэр дээрээс өнгөрсөн 2019 оноос хойш барилдаж байгаа дэлхийн аварга, олимпын мөнгөн медальт Саид Моллай Бүгд Найрамдах Азербайжан Улсын Жүдо бөхийн холбоонд өргөдөл бичиж, тус улсын нэрийн өмнөөс барилдах хүсэлтээ илэрхийлсэн байна” гэх мэдээлэл юм.

               Бид энэ талаарх мэдээллийг Монгол Улсын Жүдо бөхийн холбооноос тодруулахад “Одоогийн байдлаар энэ мэдээллийн хариуг албан ёсоор өгөх боломжгүй байна. Холбооны зүгээс мэдээллийг бататгаж, албажуулсны дараа тодорхой мэдээлэл өгөх болно. Сайд Моллай тамирчин одоогийн байдлаар Монгол Улсад байхгүй байгаа. Түүнтэй холбоотой мэдээллийг дараа долоо хоногт албан ёсоор өгнө” хэмээн ихэд нууцалж байгаагаа илэрхийллээ.

САЙД МОЛЛАЙ МАНАЙ УЛСЫН ИРГЭН БОЛСОН ШАЛТГААН...

2019 онд Исламын Бүгд Найрамдах Иран Улсын тамирчин Саид Моллай Монгол Улсын иргэн болох хүсэлтээ Гадаадын иргэн харьяатын газарт хүргүүлж, хуулийн дагуу Ерөнхийлөгчийн Тамгын газар хүлээн авсан байдаг.  

               Сайд Моллай тухайн үед Монгол Улсын иргэн болох, жүдо бөхөөр Монгол Улсын нэр дээр барилдах чин эрмэлзэлтэй байгаагаа дурдаж, хүсэлтийг нь эерэгээр хүлээж авахыг хүсэж байжээ. Харин тухайн үеийн Ерөнхийлөгч Х.Баттулга зарлиг гаргаж, 2019 оны арваннэгдүгээр сарын 20-нд Монгол Улсын иргэн Сайд Моллай хэмээн бүртгэж авч байсан билээ.

Сайд Моллай 1992 оны нэгдүгээр сарын 5-нд Иран Улсад төрж өссөн. Харин унаган нутгаа орхин Герман руу дүрвэж, гурван жилийн өмнө Монгол Улсын иргэн болсон юм. Түүний иргэншлээ солих болсон нь улстөрийн шалтгаантай холбоотой байдаг. Дэлхийн аваргын алтан медалиас атгаад алдсан тэр дарамтад орж, арга буюу ялагдсан байдаг. Тодруулбал, 2019 оны наймдугаар сард Токио хотод зохион байгуулагдсан ДАШТ-д Сайд Моллай хэсгээ тэргүүлж,  цааш амжилттай барилдвал Израилийн бөх Саги Мукитай оноолт таарах байсан юм.

               Харамсалтай нь, Иран Улс Израйльтай дайсагнадаг учир тамирчдаа тус улсын бөхчүүдтэй барилдахыг хориглодог байжээ. Иймд Ираны эрх баригчид Моллайг дайсан орны бөхтэй барилдуулахгүйн тулд өмнөх барилдаандаа зориуд ялагдахыг шаардсан гэх яриа бий. Тухайн үед Ираны тагнуулынхан тамирчны дэвжээнд очиж, Сайд Моллайг дарамталснаас гадна Тегеран дахь гэрийнхэнд нь дарамт шахалт үзүүлж, Ираны Элчин сайдын яамны төлөөлөгч уулзан сануулга өгсөөр байсан гэдэг. Мөн түүний ар гэрийнхэн хэл дуулгаж, дарамтад байгаагаа, гэрийнхэн нь гадаа олон хүн цугларч, дарамталж байгааг хэлсэн байдаг. Гарц, гаргалгаагүй, хүнд байдалд орсон тэрбээр Бельгийн бөхөд зориуд ялагдаж, Израилийн бөхтэй медалийн төлөө барилдах боломжоо алдсан гэдэг. Мөн хүрэл медалийн төлөөх барилдаанд Гүржийн бөхөд ялагдсан байлаа. Түүний жинд Иран Улсын тамирчин алтан медаль хүртэж байсан юм. Дэлхийн аваргын дараа Сайд Моллай нутаг руугаа буцалгүй, Европ руу дүрвэж, Герман Улсад орогнож байгаад, Монгол Улсын иргэн болох хүсэлтээ өгсөн билээ. Ингэж Монголын ард түмний алгаа тосон угтаж авч байлаа.

ТЭР АМАЛСАНДАА ХҮРСЭН...

               Тэр хэдхэн сарын өмнө монголчуудыг нэгтгэж, нэгэн биеэр оршиход, нэг зүйлийн төлөө залбирахад, уухайлахад, огшиж дуулахад гол хүн нь болж байлаа. Тэр Монголын далбааг Токиогийн тэнгэрт мандуулж, олимпоос мөнгөн медаль хүртэж, монголчуудыг нэг цэгт, нэг цаг дор баярлуулж байлаа. Тийм ээ, тэр “Монголын хүү Молом” гэж дуудуулж, “Миний, чиний аймгийнх” гэж хүртэл талцуулж, тааваар нь жаргааж байлаа.

Тэр амалсандаа хүрсэн. Токиогийн тэнгэрт Монголын далбааг мандуулсан цөөн жүдочийн нэг нь болсон. Тэр жүдогийн спортод өөрийнхөө өнгийг тодорхойлж, өрсөлдөгчиддөө “Монголын жүдочид хатуу самар шүү” гэдгийг дахин сануулж, ойлгуулсан. Тэр хийх ёстой бүх зүйлээ хийсэн.

               Харин түүний тухай мэдээлэл цацагдаж эхэлсэн даруйд монголчууд янз бүрээр бичиж байна. Зарим нь “Хүний эрхийн асуудалд хүн бүр оролцох эрхгүй. Тэр хийдгээ хийсэн учраас явах сонголтоо ч өөрөө хийх нь зөв .Бид олигтой дэмжиж, тусалж чадахгүй учраас тэр тийм сонголт хийсэн байх. Түүний буруу биш. Тэр Монгол Улсад ямар ч өргүй. Олимпын мөнгөн медаль манай улсын нэр дээр бүртгүүлж өгөөд явсан. Баярлалаа” гэх мэтээр сэтгэгдлээ илэрхийлж байна.Зарим нь “Улс, улс дамжсан ийм хүмүүсийг эртхэн явуулсан дээр. Нас нь харьж яваа түүний оронд залуу тамирчдаа дэмжсэн нь зөв. Хүний хүн хүнийх л байдаг. Тэр эцэст нь хаана ч байсан хамгийн сүүлд нутаг руу буцаж очно” зэргээр бичиж байна.

МОНГОЛЫН ТӨЛӨӨ ХИЙСЭН, ХИЙХ БАРИЛДААН БҮРД ЧИНЬ, БАЯРЛАЛАА “МОНГОЛЫН ХҮҮ” МОЛЛАЙ МИНЬ

               Тийм ээ, түүний явах эсэх нь ердөө л өөрийнх нь эрхийн асуудал. Харин явах байсан ч, үлдэх байсан ч түүнд бид баярлах хэрэгтэй. Монголын төлөө барилдсан барилдаан, давсан даваа бүрд нь баярлаж, талархах хэрэгтэй. Тэр нэгэн цагт, одоо ч гэсэн  Монголын төлөө зүрхээ цохилуулж яваа тамирчин шүү дээ.

Монголын төлөө хийсэн, цаашид хийх барилдаан бүрд чинь баярлалаа, “Монголын хүү” Моллай минь...