Монгол Улсын Гавьяат тамирчин Ц.Цогтбаатарын "Токио-2020" олимпын дэвжээн дээр үзүүлсэн хамгийн гал цогтой, эрэмгий, дайчин, эрэлхэг барилдааныг мэдэхгүй хүн байхгүй. Дэлхий өөрөө түүний цог золбоо, өнгө төрхөд мэхийх мэт барилдсан гэхэд хэтийдэхгүй болов уу. Тун эвлэгхэн, чадварлаг, торох юмгүйгээр өрсөлдөгчөө унагаад, гараа атган чангаар хашгирах түүний ялалтын, амжилтын дараах төрх хүн бүрийн бахархлын цээжинд хадгалагдан үлдсэн гэдэгт итгэлтэй байна.  Ийм л нэгэн ирмэг, цаашид ч өсөх бололцоо дүүрэн залуу тамирчин бидний дунд төржээ. Өнөөдөр түүний төрсөн өдөр, спортын тэнгэрт өөрийнхөөрөө дүүлэн нисэхээр мэндэлсэн өдөр. Монголынхоо тугийг олимпын тэнгэрт мандуулах гэж ирсэн өдөр. 

   Баянхонгор аймгийн Хүрээмарал сумын харьяат ШШГЕГ-ын  “Сүлд” спорт хорооны тамирчин тэрбээр багаасаа барилдах сонирхолтой байжээ. Түүнийг багш нар нь жүдо барилдахдаа илүү авьяас, өгөгдөлтэй гэдгийг онцлон ярьдаг. Тэр өөрийн авьяасаа хөдөлмөрөөр зүлгүүрдсэнээр сайн тамирчин болж, олимпын хүрэл медальд хүртлээ явжээ. Хамгийн их үлгэр дууриалал авдаг, хөшүүрэг, түшиг тулгуур болж байсан хүн түүний аав гэж тэр мөн хэвлэлд өгсөн яриандаа дурссан байдаг бөгөөд аавыгаа өнгөрснөөс хойш өөрийнхөө амьдралыг өөрөө өөрчилж, зүтгэнэ гэсэн зарчмаар тэр спортдоо үнэнч, тууштай зүтгэж яваа нэгэн. Спортоос гадна хоёр хүүхдийн аав гэх хариуцлагатай ажлын үүргийг тэр авчээ. Харин спортын хувь "Токио-2020" олимп бол Ц.Цогтбаатарын хувьд дөнгөж эхлэл. Түүний өмнө олон барилдаан, олон ч дэвжээ бий. Асаад бай, дүрэлзээд бай эрэлхэг зоригт тамирчин минь, дөнгөж хорь гаруйхан нас...