Олон улсын сагсанбөмбөгийн холбоо /ФИБА/-ноос энэ онд зохион байгуулах Ази тивийн аварга шалгаруулах тэмцээний урьдчилсан шатанд оролцох эрхийн тэмцээн, БНХАУ-ын Ханжоу хотод болох Азийн наадмын тэмцээнүүдэд Монголын үндэсний шигшээ багийн тамирчид өрсөлдөнө. Иймд шигшээ багийн өргөтгөсөн бүрэлдэхүүнийг албан ёсоор зарлахын зэрэгцээ Дээд лигийн Плэй-оффын хоёр дахь шатанд өрсөлдөж буй багуудын дасгалжуулагч нар шигшээгийн дасгалжуулагчийн багт шууд уригдаж байгаа юм. Өргөтгөсөн шигшээ багт дуудагдсан бүх тоглогч нэгдсэн бэлтгэлдээ хамрагдах бөгөөд эндээс шигшээ багийг эцсийн байдлаар бүрдүүлэх юм байна. АНУ-аас Энхийн-Од, Дөлгөөн. Тайваниас Баясгалан, Саруул-Эрдэнэ, Сугар-Очир тэргүүтэй хилийн чанадад тоглож буй тоглогчид нэмэгдэх боломж нээлттэй байгаа аж.