Дэлхийн бөхийн нэгдсэн холбооноос өнгөрсөн долоо хоногт Туркийн Стамбул хотод болсон дэлхийн чансааны оноо олгох тэмцээний дараа чансааг шинэчлэн гаргажээ. Тус тэмцээнд эмэгтэйчүүдийн 53 кг жинд алтан медаль хүртсэн ОУХМ Б.Болортуяа 56200 оноогоор дэлхийн чансааг тэргүүлж эхэллээ.

  Тэрбээр Токиогийн олимпын хүрэл медаль хүртсэн оноондоо Туркэд түрүүлж 13000 оноо нэмэрлэж, таван байраар урагшилж, ийнхүү 53 кг жинд тэргүүллээ.

   Өнгөрсөн жилийн Ослагийн ДАШТ-аас хүрэл медаль хүртсэн ОУХМ Д.Тулга Яшар Догуд тавдугаар байрт орж, 53500 оноотой болсноор гурван байр урагшилж, 55 килограммын дүнд хоёрдугаар бичигдэж байна. Харин Стамбулд хүнд жинд үзүүрлэсэн ОУХМ М.Лхагвагэрэл 65400 оноогоор нэг байр ахиж, 125 кг-д дөрөвдүгээр байр руу дэвшжээ. Мөн эрэгтэйчүүдийн 61 кг жинд  ОУХМ Т.Түвшинтулга 25000 оноогоор зургаад, 79 кг-д ОХУМ Б.Бат-Эрдэнэ 17000 оноогоор найм, эмэгтэйчүүдийн 50 кг-д ОУХМ Д.Отгонжаргал 41200 оноогоор долоод, 57 кг жинд ОУХМ Э.Даваачимэг 31000 оноогоор долоод, 59 кг ОУХМ Б.Шоовдор 31000 оноогоор дөрөв, 62 кг ОХУМ Э.Гантуяа 31000 оноогоор найм, 68 кг Хөдөлмөрийн баатар С.Батцэцэг 23000 оноогоор наймдугаар байрт тус тус бичигдэж байна.

  Тэгвэл тус дэлхийн чансааны тэмцээнд илүүрхэж түрүүлсэн гавьяат тамирчин С.Цэрэнчимэд 13000 оноо цуглуулсан ч 62 кг-д өмнө нь ямар ч оноогүй байсан тул чансаанд эхний хорьд хараахан багтаагүй байна. Дэлхийн чансааны оноог гаргахад Стамбулын тэмцээнээс гадна  өнгөрсөн жилийн Токиогийн олимп, Ослогийн ДАШТ-ийн үр дүнг харгалзан үзжээ.